SHILLONG: A·chik National Volunteers Council (ANVC) dolrang baksa sorkarini songgigrikaniko da·o taridapna sienggipa Sixth Schedule-o chapatna man·jaha ine Opposition dolni dilgipa Mukul Sangma, a·dok sorkariko matnangataha.
Sangma-ni parakatani gitade, ANVC dolrang baksa ma·mong aro a·dok sorkarini songgrikani namgniara Sixth Schedule-ko taridapanio man·chapanisa ong·achim aro ia namgnirangko a·dokni pilak autonomous district council (ADC)-rangan man·ani ong·engachim.
“ANVC dolrang baksa songgigrikaniara manderangni nangnikanirangko chu·sokatna aro Sixth Schedule-o pangchake district council-rangni kamko mangrakbatatna gita ma·mong aro a·dok sorkari dolgninan bilakbegipa kol ong·achim,” ine Sangma aganaha.
Ia songgigrikaniko nipiltaiani gri a·dok sorkari, an·tangni daitokon chu·sokatjaha ine matnangatengon, ADC-rangko namdapatna gita sorkario skani aro on·kanganian dongjakon ine Opposition dolni dilgipa parakataha.
Sangma-ni aganani gitade, ANVC dolrang baksa songgigrikaniko sorkari simsakna gisik nangjahani gimin sorkarini kamrango chu·sokgijaniko mesokani ong·enga.
Sixth Schedule a·jarango ADC-rangna on·gimin dingtangmanchagipa daitorangni bidingo janapatengon, gipin biaprango gita Sixth Schedule a·jarangode Panchayati Raj system dongja ine Sangma parakataha.
“An·chingo Panchayati Raj system dongjani gimin ADC-rangna pilak nanga dakchakanirangko on·skana nanga,” ine ua aganaha.
ANVC dolrang baksa songgigrikanio pangchakesa ADC-rangna skanggipa tangka paisani gita dakchakanirangkoba on·aha aro district council-rangko kim·kime ong·e rakkina gita a·dol sorkari, tangka paisarangko man·bae on·na nangkuenga ineba Sangma aganaha.
