SHILLONG: Meghalaya a·dokni tourist taxi bolsako Assam-ni driver-rang ka·mikkenataha.
Ia tourist taxi-o nisan gisimko songani gimin Assam-o dolsa tourist taxi driver-rangni ka·mikkenataniko Budbar salo video ge·saoniko niksona man·aha.
Ia video-o Assam-ni taxi driver-rang, Meghalaya-ni tourist taxi-o nisan gisimko songani gimin driver-ni kosako sing·doe roanirangko aro Assam-o gari salengmiting somoiode iandakgipa nisanrangko songna man·jawa ine ka·mikkenataniko nikna man·aha.
Meghalaya a·dokosan iandakgipa nisanrangko songe salchina indiba Assam-ode salna man·jawa ineba video-o Assam-ni taxi driver-rangni agananiko nikna man·aha.
Meghalaya a·dokni dingtang dingtang tourist spot-rangona Assam-ni taxi-rang, manderangko salrurae on·enganiko champengchina dabienba All Khasi Meghalaya Tourist Taxi Association (AKMTTA), anti gimikna nisan gisimko taxi-rango songe jingjengatangahachim ine nikna man·a.
Koborko on·ani gitade, ia a·sel ong·ani Khanapara taxi stand-o ong·aha aro ja·mano Meghalaya a·dokni taxi driver, sinjetako man·enba, an·tangni gario kadegipa nisanko ra·galaha.
Indake ong·engon, batanggimin adita salrangni gisepo Khanapara-oni taxi driver-rang, manderangni kosako kragija kamrangko ka·enga ine songre songgabatenggipa mitam manderangoniba badi ka·anirangko knasona man·aha.
Mongolbar saloba adita sak taxi driver-rang, Shillong-ni adita sak manderangko ka·dongode taxi stand-oni ong·katangchina aro Shillong-ona re·angchina ine kragija dake ra·bianirangkoba dakaha.
Assam-ni tourist taxi-rangko Meghalaya a·dokni dingtang dingtang biaprangona manderangko salaniko champengchina dabitokengoba Assam-ni garirangko Meghalaya a·doko champengani dongjawa ine a·dokni Tourism Minister Paul Lyngdoh parakatskaaha.