SHILLONG: Meghalaya a·dokni Khasi aro Jaintia Hills jolrango jabol galchakna gita biaprangko man·jaengahani gimin songtangtangon jabol galchakgipa biaprangko donchina gita sorkari didina tik ka·angaha.
A·dokni Deputy Chief Minister aro Urban Affairs Minister Sniawbhalang Dhar-ni kobor ra·timgiparangna parakatani gitade, bakan iani bidingo chanchirimna gita ua tom·aniko ong·atanggen.
“Chinga September ja bon·na skangan deputy commissioner (DC)-rang aro block development officer (BDO)-rang baksa tom·aniko ong·atanggen aro BDO-rang, dingtang dingtang songni dilgiparangna, songtangtangon jabol galchakgipa biaprangko donna gita ge·etangskagen,” ine Dhar aganenba, West Jaintia Hills a·jani Wahiajer aro uandakgipa gipin songrangode an·tangtangni jabol galchakgipa biaprang donga ine parakataha.
“Songtangtango, mongsongbate mande jelbra jelsugipa biaprango an·tangtangni jabol galchakram biaprangko donchina chinga didina ska,” ine ua aganaha.
A·dokni dingtang dingtang biaprango jabol galchakram biaprangko kulina gita a·a ra·na chanchienggipani bidingo chanchirimna gita ua Bristibar salo tom·aniko ong·atgen ineba a·dokni Urban Affairs Minister parakataha.
“Jabol galchakram biapna pangnan a·arangko man·na neng·ani ong·enga, uni gimin anga a·doko songdongenggipa manderangko aro dingtang dingtang dolrangko sorkari baksa bakrime kam ka·china anga mol·molenga. Indake ong·genchimoba a·arangko man·na gita chinga sorkarichipakni rake kam ka·gen,” ine Dhar aganaha.