SHILLONG: Manderangni nangchongmotgipa dingtang dingtang bosturangni dam rakbatroroengani gimin jegale Voice of the People’s Party (VPP)-ni membor-rang, da·al Sukrobar salni bako Shillong songjinmao asonge jingjengatanirangko dakanggen.
Iani bidingo kobor ra·timgiparangna u·iatengon, “Dingtang dingtang bosturangni dam rakbatroroengani a·sel ramram manderangsa neng·nikanirangko chagrongna nangtokengani gimin Sukrobar salo pring 10:00 bajioni attam 5:00 bajiona, Shillong songjinmani Malki robol kal·chakramo asonge jingjengatna tik ka·aha,” ine VPP-ni president Ardent Miller Basaiawmoit parakataha.
A·doko songdongenggipa pilak manderangkon uamangni jingjengatanio bak ra·echina gitaba VPP-ni president didiataha.