TURA: Meghalaya a·dokni pilak a·jarangon ong·atenggipa ‘Back-to School’ campaign-ni bak gita Sukrobar salo, Shillong-ni Red FM 93.5, Roadshow aro dingtang dingtang program-rangko, Tura Super Market, Chandmari Bazar, Tura Bazar aro Rongram Bazar-o ong·atangaha.
Ia program-ko Tura-ni District Legal Services Authority, National Legal Services Authority-ni ning·o, Meghalaya State Legal Services Authority aro Red FM 93.5 Shillong baksa nangrime ong·atangaha.
Poraia dontonggipa bi·sarangko skul watpiltaichina gita West Garo Hills a·jao songdongenggipa manderangko didina ia program-ko ong·ataha.
Ia program-ko ong·atanio, DLSA-ni Jingjang Ch Marak, Indian Constitution-ni Article 21A-ni ning·o on·gimin niamrangni bidingo talate on·angengon, ia niamni ning·o bi·sarangna indin lekka porako ra·na gita bilrangko on·manahani gimin bi·sa sakantian nangchongmotgipa bida budio indin ra·na gita bilrang donga ine parakataha.
Gittimtangtango poraia dontonge dongenggipa bi·sarangko sandienba skulrangchi watpilchina ma·a paarangko aro skulo poraienggipa bi·saskarangko didiangengon, iani bidingo Tura-ni DLSA-o donggipa Room No. 202-oniko dakchakanirangko ra·na man·gen ba National Institute of Open Schooling (NIOS)-ni on·enggipa dakchakanirangko ra·na man·gen ine Marak parakataha.
Poraia dontonggipa bi·sarangko skul re·piltaina on·enggipa helpline nombor 15100-ona ka·ate dakchakanirangko ra·china gitaba ua ma·a paarangko aro jolo songdongenggipa manderangko didiangaha.
Ia program-ko ong·atanio Red FM-ni membor-rang chrokanirangchiba manderangko an·saoatangaha aro ia tom·anio dingtangmancha bi·sarangna susaanirangkoba ong·ate boksisrangko suale on·angaha.