SHILLONG: Matchu den·aniko champengna gita miksonganio dolsa Hindu manderangni ‘Gau Dhwaj Sthapana Bharat Yatra’-ko re·baenggipa October 2 tariko ong·atna miksongengani gimin ian Meghalaya a·doko dingtang dingtang jatrangni gisepo tom·tome songdong a·chaaniko golmal ong·atani gita ong·gen ine ia yatra ba re·jomaniko ong·atna on·jachina gita Voice of the People’s Party (VPP)-ba a·dok sorkariko didiataha.
“Indian Constitution ba a·songni niam bidikon dingtang dingtang toromrangna jakgitelaniko on·manahani gimin iandakgipa re·jomanirangko ong·ataniara a·doko dingtang dingtang jat aro toromrangni gisepo ding·chaogrikataniko ra·baani ong·gen,” ine a·dokni Chief Minister Conrad K Sangma-na sedoatgipa chittio Shillong-ni MP aro VPP-ni dilgipa Ricky J Syngkon parakataha.
Syngkon-ni parakatani gitade, toromtangni daka rikaniko ja·rikaniara a·songni dongimin bilan ong·a ine VPP bebera·a indiba iandake gipin torom ba jatrangni daka rikaniko, cha·ani ringaniko aro janggi tanganiko champengna jotton ka·aniara songsalo tom·tomaniko golmal ka·na jotton ka·ani gitasa ong·gen.
“Dingtang dingtang jat aro toromrangni tom·tomao meli nangrime janggi tangani giminsa Meghalaya a·doko mingsinga aro iandake dingtang dingtang jatrangni gisepo ding·chaogrikataniko ra·bana jotton ka·anikode name nichengna nanga. Ia Yatra ba re·jomaniko ong·atanichi Meghalaya a·doko dingtang dingtang jatrangni tom·tome songdong a·chaaniko golmal ka·ani gitasa ong·gen,” ine Shillong MP parakataha.
A·doko dingtang dingtang jat aro toromrangni tom·tome janggi tanganiko mande ra·na nanga ine janapatengon, “Iandake tom·tome janggi tanganiko golmal ka·na miksonge ong·atenggipa program-rangkode a·doko ong·atna on·na nangja. Ian dingtang dingtang jat aro toromni gisepo meligrikgijaniko ra·baanisa ong·gen,” ine Syngkon, Chief Minister-na sedoatgipa chittio parakataha.
