SHILLONG: Gau Pratishtha Andolan (GPA) minggipa Hindu dolni, matchu den·ani aro cha·aniko champengna miksonganiara an·tangtangko ‘skia man·gijagiparang’ ine mesokanisa ong·enga ine Sombar salo National People’s Party (NPP)-ni dilgipa aro a·dokni Education Minister Rakkam A Sangma matnangataha.
Re·baenggipa October jani 2 tariko ia GPA dolni membor-rang, matchu den·ani aro cha·aniko champengna gita jinma re·jomaniko ong·atna miksongengani gimin Sangma, ia kattarangko aganaha.
Iani bidingo kobor ra·timgipa manderang baksa agangrikengon, matchu cha·aniko champengna jotton ka·aniara India a·songni jakgitelaniko, dingtang dingtang jat aro toromrangni apsan songdong a·chaaniko aro a·songni niam bidiko jakgitele olakkina ba bebera·na bil on·aniko ma·sigijanikosa mesokani ong·enga ine NPP-ni dilgipa aganaha.
“Ia manderangko a·songni kosako chakatgiparang inesa mingna kraa aro uamangko Hindu ineba mingna kraja,” ine Sangma aganenba, ia manderangni kamara India a·songni mande ine mingna kragijagiparang ong·ani gimin uamang a·songni niam bidikko name poraie ma·sie ra·chengna nanga ine parakataha.
Meghalaya a·doko ua an·tangko man·chape pilakan matchu be·en cha·na namnikgiparangsa ong·a ine janapatengon, toromni be·en cha·aniko champengna jotton ka·genchimode ua raken jegalaigen ine Sangma aganaha.
“Darangba sakgipinrangni cha·ani ringaniko champengna ba drana bil dongja,” ine ua aganaha.
1987 bilsio Tura-ni gitcham MP Purno A Sangma sagini Parliament-o, a·songo songdongenggipa manderangni cha·ani ringaniko champengna man·ja ine jera ra·anikoba Rakkam janapataha.
Gau Pratishtha Andolan (GPA) minggipa Hindu dolsani manderang, matchuko ‘ma·gipani’ gadangosa channa ine a·doko matchu den·aniko champengna gita October-ni 2 tariko re·jomaniko ong·atna manchiengon, ia dolna permission-ko on·jachina gita a·dokni dingtang dingtang dolrang aro a·doko songdongenggipa manderang, a·dok sorkariko diditokskaengachim.
