SHILLONG: Inner Line Permit (ILP) ra·gatchina dabianiko ma·mong sorkari knachakjaengani gimin, a·dokona niam gri napsrukanirangko champengna man·na gita a·dokni damgittam autonomous district council (ADC)-rangko jatni bewalo dingtangmancha niamrangko ra·gatskachina a·dokni Bharatiya Janata Party (BJP) ku·pattianiko on·angaha.
Meghalaya a·doko ILP-ko ra·gatchina dabiengon, Sixth Schedule a·jarango apsan dakgipa niamrangko ADC-rang ra·gatskana nanga ine BJP-ni state vice president Bernard N Marak ku·pattianiko on·angaha.
“ILP-na dabiani bidingo chingaba agangrikenga indiba constitution-ni gita neng·nikanirang dongkuenga. Indake ong·genchimoba Meghalaya a·dokara Sixth Schedule a·jasa ong·ani gimin aro ADC-rangko jakgitele chalaina bilko on·manahani gimin uamangan ILP gita dakgipa niamko ra·gatskana man·gen,” ine Marak aganaha.
Marak-ni parakatani gitade, a·dokona re·baenggipa manderangara India-ni manderang ong·ama ong·ja uko songni nokmarang ba jatni dingtang dingtang dolrangan jako ra·e am·sandiskana nangenga.
Meghalaya a·doko niam gri napsrukanirangchi neng·nikanirangko chagrongna nangenga ine janapatengon, “Niam gri napsrukanirangko an·chingba nirok sandina gita dongimin niamrang donga. Tourist-rangkode an·ching a·dokona re·bana on·na nangaia,” ine BJP-ni state vice president aganaha.
ILP-na nangchongmotgipa ong·a aro iana a·dokni BJP dol, ma·mong sorkari baksa agangrikangkugen ine ku·rachakaniko on·angengon, a·doko ILP-ko man·bebegenchimoba Sixth Schedule-ni niamrangkode pe·na man·jawa ba ADC-rangni aro jatko dilenggiparangni bilkode re·badena man·jawa ine Marak parakataha.
“An·chingni biaprangko chel·chakna gita an·ching jatni dakbewal rikbewalrangkon ja·rikna nanga,” ine ua aganaha.
Rel garirangko ra·baani bidingo janapatskaengon, “Angni chanchiani gitade Meghalaya a·dokona rel ramarangko ra·bana nanga. Khasi Hills-ona rel ramarangko ra·bana gita dingtang cholrangko sandina nangenga. Garo Hills-ode Mendipathar-ona rel garirang sokbaaha,” ine Tura-ni MDC aro BJP-ni state vice president aganaha.
Khasi Hills jolrango rel garirangko champengsoenggipani bidingo janapatskaengon, “Manderangni skaniko pe·ede an·ching dakna man·jawa maina manderang namnikgenchimosa an·ching Khasi Hills jolrangonaba rel garirangko ra·baani giminde chanchina man·gen,” ine Marak parakataha.
