SHILLONG: Adita jarangni gisepo ong·atna sienggipa Gambegre Assembly Constituency-ni by-election-o a·dokni Bharatiya Janata Party (BJP), doltangari susana miksongenga indiba ia pilakan ma·mongo BJP-ko dilenggiparangni nangnikaniosa pangchakaigen ine BJP-ni dilgipa aro a·dokni Cabinet Minister AL Hek parakataha.
“Gambegre by-election-na chinga gipin dolrang baksa bakrimna nangnikjaenga indiba jeko ma·mongni dilgiparang tik ka·a ukon chinga ja·rikna nangaigen,” ine Hek aganaha.
Re·anggipa chang Lok Sabha election-o BJP, a·dokni damgni parliamentary constituency-rangon susagija NPP-nasa chakpaaniko on·skaahachim aro iani a·selan BJP-ni bang·a membor-rangan suk ong·jae party-ko wate kattokahachim.
Iani giminsa da·o Gambegre by-election-ode BJP, gipin dolrang baksa bakrimna nangnikjaengama ine sing·anina aganchakaniko on·angskaengon, “Chinga a·doko Lok Sabha election-ko susae nikujani gimin chi·ama ka·a name ma·sikujaenga. Lok Sabha election-o chingko NPP-na chakchina ma·mongni dilgiparang aganahani giminsa chinga NPP-na chakpaaniko on·aha,” ine Hek aganaha.
Gambegre by-election-o susaani bidingo ua ma·mongni adita sak dilgiparang baksa agangrikaha aro uamang bang·batan BJP-ni susaaniko nangniktokenga ineba Hek parakataha.
Gambegre by-election-na candidate-ko seokani bidingo janapatskaengon, candidate-kode ma·mongni dilgiparangsa tik ka·gen ine Hek aganaha.
“Gambegre by-election-na candidate-ko ma·mongni dilgiparangsa parakatgen. Chinga bimingrangko on·atna man·a indiba candidate-ko seokanide ma·mongni jakosa,” ine ua aganaha.
BJP-ko Hindurangni dol ine matnanganichi Gambegre by-election-na nangchakeaniko ra·bagenma ine sing·skaon, iachi maming dakeba nangchakeani dongjawa aro ia by-election-ko BJP cheani cholrang donga ine BJP Minister aganaha.
“Chinga rake kam ka·genchimode aro ma·mongni dilgiparangba chingna chakpaanirangko on·genchimode chinga campaign ka·e chegipa ong·telgen,” ine ua aganaha.
