RESUBELPARA: North Garo Hills a·jani Bajengdoba C&RD Block-ni ning·o donggipa Jemangre Adhoc LP skul nok namsrangjahani a·sel poraienggipa bi·sarang aro skigiparangba neng·nikanirangko chagrongna nangtokenga ine ia skul nokko ta·raken rikpiltaie on·china gita A·chik Holistic Awakening Movement (AHAM) dolni dilgiparang, a·dokni Chief Minister Conrad K Sangma-ko didiataha.
Koborko on·ani gitade, Jemangre Adhoc skulo komibeoba sak 20 bi·sarang poraitokpaengachim indiba ia skul nokko changsaba taridape on·anirang dongjani a·selo da·o skul nokni obosta namsrangjae, skulo poraienggipa bi·sarang aro skigiparangba neng·nikanirangko chagrongna nangtokengachim.
“Ia skulan ia jolrango donggipa dingtang dingtang songni bi·sarangna a·gilsakni seng·aniko on·paenggipa skul ong·achim indiba ia skul nokni obosta namsrangjahani a·sel skulo poraienggipa bi·sarang an·tangtangni lesson-rangko name skie ra·na man·tokjaenga,” ine AHAM-ni dilgiparang parakataha.
AHAM-ni parakatani gitade, ia skul nokni obosta namja baksana classroom-rangkoba name nirok sandia dongja aro sorkarini gitaba ia skulna tangka paisarangko dakchake on·anirang dongjani a·selo skulko name chalaina man·jaengachim.
“Ia skul noko nokkingrangni selprupruaniko, kelkirangni be·aniko aro pakmarangni nosto ong·anirangkosa nikna man·a aro bi·sarangni asongchakenggipa bench-rangba bang·batan be·gimin aro gitchamrangsa ong·e bi·sarangna kenchakna nangani ong·enga. Ia skulo rongtalgipa ringani chi, a·pal re·chakani, bijoli aro uandakgipa nangchongmotgipa cholrangba dongja,” ine AHAM Mendal unit-ni dilgiparang parakataha.
Ia skul nokko ta·raken rikpiltaie on·china Chief Minister-ko didiatengon, ia skulna chu·onga gita textbook-rangko, sechakani bohirangko aro pilak nangchongmotgipa bosturangko on·china gitaba AHAM didiataha.
