SHILLONG: South Garo Hills a·jani Coal India Limited (CIL) depot damgnio segatgimin metric ton (MT) 57,000 koelarang gimaaha ine matnanganirangko sandirokchina gita Justice (retd) BP Katakey-chi dilenggipa committee ge·etaniko on·angaha.
Iani bidingo kobor ra·timgiparangna u·iatengon, segatgimin koelarangko a·dok sorkari dakkie galna siengon, South Garo Hills a·jani CIL depot damgnini koelarangde gimaaha ine ua badi ka·anirangko man·soaha ine Katakey parakataha.
“Koelarangan dongjaha ong·ode maina auction ka·kugen?” ine ua sing·doangaha.
Katakey-ni aganani gitade, ia depot damgnio segatgimin MT 57,000 koelarang donga ine a·dok sorkari a·kangengoba, ia depot damgnion koelarang dongjaha ine South Garo Hills a·jaoni una badi ka·doatskaahachim.
“Iani bidingo sandirokchina anga Chief Secretary-na u·iataha aro iani bidingo anga deputy commissioner baksa agangrikon, ia depot-rango koelarang dongkuenga ine ua aganskaaha,” ine Katakey aganaha.
Iani bidingo talbate see on·china ua deputy commissioner-na ge·etaniko on·aha aro salgni salgittamni gisepon ua report-ko man·na ka·dongenga ineba Katakey parakataha.
“Report-o pangchakesa anga nanga gita ja·kurangko de·anggen,” ine ua aganaha.
Ia biaprango koelarang dongbebea dongbebeja, uko ma·sie ra·na gita pilak nanga u·iatanirangko on·china ua ge·etaniko on·aha ineba Katakey aganaha.
2018 bilsio Nongalbibra-o rim·gipa MT 200 koelarangni gimaani bidingo badi ka·anirangko man·soa dongama ine sing·anina aganchakaniko on·angskaengon, iani giminde ua maming badi ka·anirangko man·soa dongkuja ine Katakey parakataha.
