Mahari football final-na Najing Bajar-ko chipatani gimin sing·doaniko DC talata

Tura: Tura-o antio salsa cha·gipa Najing Bajar-ko mahari mahari robol kal·a dongani gimin manderang bang·en ine West Garo Hills (WGH) district administration-ni chipatna chanchiaha.
Najing Bazaar-ko antio Sonibar salo cha·ronga aro district-ni noka-noksikni palgipa-simgiparang uamangni mal-bosturangko palna re·baronga. Badingchiwalgipa manderang aro bang·bata dokkanrang bang·gija somaini gisepo uamangni mal-bosturangko palenga.
Minggipin batanggimin bilsi 2-3-o robol kal·ako nina bang·en manderang re·baronga. Re·anggipa bilsini final-o tikit man·gipa man·gija stadium a·palo chedenge nigiparang bang·a baksana stadium-o gapketako nikaha. Robol final-ko nina VVIP-rangba bang·en re·baa ia changoba bang·taigen ine administration talataniko on·aha.
Mija Sukrobar-o robol final dongani gimin antio cha·gipa bajarko chipna WGH-ni DC hukumko on·aha. Chu ringgiparangchi maming a·sel-a·pot ong·jana gita dry day-koba parakatjolaha.
Football final dongani gimin antio cha·gipa bajarko maina chipatna nanga ine ua jolni manderang sing·doskaha. Robol kal·ani somaiara PA Sangma Stadium Dakopgre-o 5:30 bajiosa a·bachenga, bajar cha·anira saljatchion matchotgnokchim, robol kal·na somai ong·na skang konta 2-3 jedakeba bajarkode cha·na on·a nangachim. Chel·aoni re·bagipa manderang uamangni malrangko palna man·gija bostu gatani parako gamna nangaha, kangalrang pangnan indake galonako man·ronga” Dakopgre-ni mande saksa AM Marak aganaha.
“Bajar cha·aniara maidake Robol final-na mandikani ong·jok? Bajarko chipatani nama ong·ja chel·aoni re·bagipa kangalrangnasa neng·nikaniko man·a,” gisik suk ong·gija Bernita Marak ukil social media-o post ka·aha.
Mahari robol kal·na mangmang jako ra·gimin tournament-ba ong·ja, robol changgipako baseani inosa dingtang katta ine sing·doaha.
“World Cup ong·ja mingsinggipaba ong·ja, World Cup-ba antiko chipatja, ia bajar WGH-ni manderangna mongsonggipa ong·a, uamang salgipinoba kal·atna man·jama,” Sengbreez Marak, EGH-ni saksa aganaha.