SHILLONG: Adita salrangna skang Shillong songjinmao mande saksako dakait dakanina police-rang, mande sakgniko rim·aha.
East Khasi Hills a·jani SP Sylvester Nongtner-ni parakatani gitade, rim·ako man·gipa mande sakgniara bilsi 25 ong·gipa Max Eric Syiemlieh aro bilsi 22 ong·gipa Melvin Tongwah ong·a.
Ia a·sel ong·ani re·anggipa September 14 tariko ong·aha aro ia a·selni bidingo FIR-ko September-ni 18 tariko, Sadar police station-o ka·angani ja·man ia mande sakgniko police-rang rim·na man·aha.
FIR-o janapani gitade, unsalo dokkan chipani ja·man ia mandeko, mande sakgittam, dingtang dingtang scooty-o re·baenba, Little Blossom School sambao chadrapeaha aro an·tangtangni ra·bitgipa silchidarerangko mesokenba uko ka·mikkenataha. Indakmiting somoio sakgipin mandeba, scooty bolgipino silni rod-ko ra·e ua biapona re·baaha aro uamang, ia mandeoniko sandienba, uni pale man·gipa gong 10,200 tangkarangko ra·seke katangaha ineba FIR-o parakaha.
Indake ong·engon, ia a·selni bidingo police-rang ta·raken mokordomako ka·e, dos dakgipa manderangko sandina a·bachengataha aro police-rangni chanchichipenggipa mande sakgniko September 20 tariko rim·na man·aha ine SP parakataha.
Ia mande sakgniara, re·anggipa September 16 tariko, Hideaway Café-ko dakait dakna jotton ka·anio jak donggipa manderangan ong·a ineba Nongtynger aganaha.
Ia a·selo jak donggipa gipin manderangkoba rim·na gita sandikuenga ine SP parakataha.
