TURA: Garo Hills-o manderangni re·a doaniko altubatatna gita Rapido, Uber aro Ola App gita dakanggipa RE·NAKA App-ko re·anggipa September-ni 24 tariko, Garo Hills Day-ko manianio, Garo Hills Autonomous District Council (GHADC)-ni Deputy CEM Nikman Marak aro Forest In-charge EM Ashahel D Shira-ni jakchi a·bachengate on·angaha.
Ia project-ko Viksit Bharat-ni bak gita Tura-ni MDC Bernard N Marak aro unbaksa kam ka·rimenggipa chadamberang a·bachengataha aro ian Autorickshaw aro chakka samgniko sale cha·enggipa chadamberangna kamrangko nakatate on·ani gita ong·aha.
Ia Re·naka App-ara GPS-chi chalaigipa App ong·a aro ia App-ni ning·o manderangko Tura jillani je biaponikoba uamangni nangnikenggipa biaprangona autorickshaw aro motorcycle-rangko sale on·ani donggen.
Ia service ba kamko October jani skanggipa anti dipet a·bachenggen aro iana autorickshaw aro chakka samgni donggipa garirangna da·o registration-ko a·bachengatengaha ine Tura-ni MDC Bernard Marak parakataha.
Ia Re·naka App-o nangani kri me·asa ba me·chik driver-rangko jakkalna man·gen ine u·iatengon, manderangko salruraanio aro ma·manti bosturangko manderangona sokatanio Tura-ni autorickshaw association aro uandakgipa dolrangba dakchakanirangko on·enga ine Marak parakataha.
“Ia je somoioba gari salrurae on·ako nangenggipa manderangna namen dakchakani ong·gen aro chatro chatrirangba je biaponiba je somoioba autorickshaw ba motorcycle-rangko tik ka·atna man·aigen. Scooty ba motorcycle-rang donge tangka paisa kamaina sikenggipa chadamberangnaba ian namgni ong·gen,” ine Tura MDC parakataha.
