SHILLONG: Meghalaya Medical Services Recruitment Board-ni Health and Family Welfare Department-ni ning·o ong·atgipa staff nurse recruitment exam ba porikkani result-ko Sonibar pringo parakataha. Result-ko nike a·dokni mitam nurse candidate-rang suk ong·gijaniko parakaha aro result-ko parakatanio tik ong·gijani gimin sing·doaha.
Kobor ra·timgiparang baksa agangrikmitingo nurse Lurstep Nongrum, porikkani result-ko parakatanio tik ong·gijani donga ine aganaha. ‘Result-ko parakatanio ronggrikani dongja. Candidate-rangni biming dongja, marks dongja aro Khasi, Garo categories-ko aro reserved categories-ko janapa dongja. Porikkao sawa bang·bate aro komibate mark-rangko man·achim ba cut-off marks badita, iarangko u·ija.”
Iarang dongjani gimin result-ko parakatanio tik ong·gijaniko mesoka. Badita sak candidate-rang porikkao asongaha, badita centre-rangko songaha ba cut-off marks badita ong·achim, iarangko chinga u·ija. Iana chinga aganchakaniko nanga.
Nurse sakgipin Bakyntiew Suting-ba nurse recruitment exam-ni result-ko parakatanio ru·utani gimin suk ong·gijako parakaha. “Health Minister Ampareen Lyngdoh, a·bachengaode nurse recruitment exam-ni result-ko konta 72 somoini gisepon maming donnua gri parakatgen ine ku·chakahachim. Indiba result-ko parakatna somoiko ru·uten ra·aha. Iarangni gisepon chu·ongnikna gita result-ko parakata dongja uni gimin chinga result-ko talen parakatja. Uni gimin chinga marks aro categories-ko parakatchina dabia, ine Suting aganaha.
Sombar salona talgipa result-ko on·china gita nurse-rang dabienga. Authorities, merit list-ko gimik candidate-rangni bimingrang, badita marks man·a, uamangni categories, porikka segipa chu·gimik candidate-rangni list-ko parakatna nanga.
