SHILLONG: Bangladesh a·songo so·sojengjeng ong·anirang namsrangkujaengani gimin sima ari gita Meghalaya a·dokona niam gri napsrukbaaniko champengsona a·dok sorkari, Border Security Force (BSF), songni nokni dilgiparang aro dingtang dingtang dolrang nangrime kamko ka·na nangenga ine Khasi Students Union (KSU) parakataha.
“Bangladesh a·songo ong·enggipa obostarangko an·ching pilakan nikenga aro da·o uamang tom·tomaniona re·bapilna gita kamrangko ka·engoba salantian chonchongipa jatrangko dokkol ka·na jotton ka·kuengani gimin iandakgipa jatni manderang kenjagokenba, West Bengal, Assam, Meghalaya aro Tripura a·dokni simarang gita India a·songo katnapna jotton ka·ani cholrang dongaia,” ine KSU-ni general secretary Donald V Thabah, kobor ra·timgiparangna aganaha.
Batanggimin somoirangoba Meghalaya a·dokona niam gri napsrukbaanina BSF aro Meghalaya Police-rang, bang·en Bangladesh a·songni manderangko rim·ahachim.
“Inner Line Permit (ILP) aro Meghalaya Residents Safety & Security Act (MRSSA)-ko ra·gatchina chingni dabianirang chu·sokgipa ong·kujaengani gimin Bangladesh a·songo ong·enggipa obostarangna BSF-ni sipairang mikrake kamko ka·skana nangenga,” ine Thabah aganaha.
Sima arirangosan ong·aigija a·dokni pilak biaprangon BSF, police, a·dok sorkari, jatko dilenggiparang aro dingtang dingtang NGO-rangni gisepo bakrime kamrangko ka·na nangenga ineba ua aganaha.
Adita salrangna skangmangmangsan Purakhasia-chipakni re·baenggipa Bangladesh a·songni sak 10 manderangko BSF-ni u·iatanirangko man·soenba Zikzak Police Station-ni sipairang, rim·na gita man·ahachim.
Ia a·selni bidingo janapatengon, “Chinga police aro BSF-ni kamrangna mittelpila indiba a·song damgnini gisepo simarang namen apalbeani gimin aro badiaba badiaba biaprang gitade altuaen India a·songona re·napbana man·engani gimin BSF aro police-rangni nirok sandianiko bilakdapatna nangenga gita nika. Bangladesh a·songoni niam gri napsrukbaaniko champengna gita BSF, rakbate kamko ka·na nangenga,” ine KSU-ni general secretary aganaha.