TURA: West Garo Hills a·jani Namabilla village employment council (VEC)-ni ning·o niam gri Programme Implementation Executive Committee (PIEC)-ko songdrana jotton ka·enga ine ia VEC-ni job card donggipa manderang, MGNREGS-ni Additional District Programme Coordinator-na badi ka·doatenba, Namabilla VEC-ni ning·o niam gri committee songaniko champengatchina mol·molataha.
Namabilla VEC-o job card donggipa manderangni badi ka·doangani gitade, gitcham PIEC-ni membor-rangna dongimin term 2023 bilsini January 26 tarikon bon·ahani gimin ia committee-ko gital dake songpiltaichina uamang changni chang official-rangko mol·molatahachim indiba iani bidingo official-rang maming ja·kurangko de·chipkujaengachim.
Indake ong·genchimoba da·o ia gital committee-ko, 2023 bilsini September 8 tariko office-ni on·gimin niamrangko manigija songskana jotton ka·enga ine Namabilla VEC-ni job card holder-rang, West Garo Hills MGNREGS-ni Additional District Programme Coordinator-na badi ka·doangaha.
Namabilla VEC-ni ning·o da·o niam gri PIEC songna jotton ka·aniko champengatchina gitaba job card holder-rang didiataha.
