TURA: West Garo Hills a·jani Chibinang Primary Health Centre (PHC)-o ambulance dongjani a·sel sagipa manderangko salrurana nangani somoirango neng·nikanirangko chagrongna nangtokenga ine Chibinang-ni GSU, ADIL, ASPF aro AHAM dolrang parakatenba, ia PHC-na ta·raken ambulance bolsako on·atchina sorkariko didiataha.
Iani bidingo West Garo Hills a·jani District Medical & Health Officer (DM&HO)-na sedoatengon, Chibinang PHC-ni ning·o dam 63 songrang donga indiba ia PHC-o ambulance dongjani a·sel sagipa manderangko salruraanio neng·nikanirangko chagrongna nangtokenga ine Chibinang-ni dolbri NGO-rang parakataha.
“Chibinang PHC-ni ning·o dam 63 songrangna sanna bananirangko on·enga indiba da·alonan ia PHC-o ambulance bolsaba dongjani a·sel songni nokni manderang, sagipa manderangko salrurana nangan somoirango neng·nikanirangko chagrongna nangtokenga,” ine Chibinang-ni dolbri NGO-rang parakataha.
Chibinang jolrango songdongenggipa manderangni namgnina ta·raken ambulance-ko nangani kri ia PHC-na on·atchina gitaba dolbri NGO-rang, West Garo Hills a·jani DM&HO-ko didiataha.
