TURA: Skulrangchi re·aniko dontonganirang batroroengani gimin aro poraia dontonggimin bi·sarangko skulrangchi watpiltaina gita National Legal Services Authority-ni ning·o, Tura-ni District Legal Services Authority (DLSA), Meghalaya State Legal Services Authority (MSLSA) baksa nangrime, ‘Back to School’ campaign-ko October-ni 5 tariko, West Garo Hills a·jani Selsella C&RD Block-o ong·atenga.
Ia ‘Back to School’ campaign-ko Selsella C&RD Block-ni ning·o skul re·gija dongenggipa bi·sarangna, chatro chatrirangna, chadamberangna, budepa butchumarangna aro dingtang dingtang songrango donggipa manderangna ong·atenga ine u·iatengon, ia program-o komibeoba sak 1000-mangni gita manderang bak ra·ena ka·dongsoenga ine West Garo Hills DLSA-ni Secretary aro MJS parakataha.
Kobor on·ani gitade, ia program-o Meghalaya High Court-ni Chief Justice-ba bak ra·enaba gnang.
