TURA: West Garo Hills a·jani ning·o donggipa B-Mahal area-ko Deputy Commissioner-ni survey ka·china ge·etaniko on·aniara B-Mahal-o aro Garo Hills-o songdongenggipa pilak manderangnan jajrengsona nangani katta ong·enga ine Save B-Mahal Committee parakatenba, Sixth Schedule-ni ning·o donggipa a·a ba area-rangkode District Council-ni gitasa survey ka·na order-ko on·ani ong·a ine talataniko on·angaha.
Joint survey ka·na gita Deputy Commissioner-ni dakchakaniko nanggenchim ong·oba Sixth Schedule-ko niroktimgipade District Council-sa ong·ani gimin Council-ni order-o pangchakesa dakchakaniko on·a nanga. Ia indake mamingkoba talataniko on·chenggija Deputy commissioner-sa survey order-ko on·ahani gimin B Mahal-o songdongenggipa manderang jajrenganiko man·enga,” ine Save B-Mahal Committee-ni chairman Rimjen Ch Sangma parakataha.
Sangma-ni parakatani gitade, Deputy Commissioner-ni talataniko on·anio Industrial Park-ko a·bachengatna hectare 250-mangko nanggen ine aganaha, indake ong·genchimode, re·anggipa 2020 bilsini May 20 tariko, a·dokni Chief Minister Conrad Sangma-ni dilanichi tom·aniko ong·atanio apsan bak ra·pagiparangoni GHADC-ni CEM Albinush Marak, Rakesh Sangma aro gipin sakgni IAS officer-rang baksa apsan chanchirimaniko see rakkianiode hectare 5000 a·arang chu·gimik bangbanggipa B Mahal area-o dongkuenga ine parakaniko nikna man·skaahachim.
“Uni gimin hectare 250 a·ako nanggen ine DC-ni talataniko on·gipaming namen dingtanggrikaniko nikna man·a. Talatanirangko on·engon name rongtale ma·sichengesa talatna nanga aro chasongni chasongna songdongkamgipa manderangnaba mai namgniko dakenga, badita a·a nanggen aro badia area ba biapko nangengachim ma·sipana nanga maina da·alona kingkingba name rongtale talatanirang dongkujaenga,” ine B-Mahal Committee-ni chairman parakataha.
“Sixth Schedule-o chapatako man·gipa a·asa ong·ani gimin jolo songdonggipa manderangna maming talatchenggija a·ako skatang survey ka·aniara ia B Mahal-o songdonggiparangko changala gita ba uamangni Land Rights-ko pe·a gita ong·enga. Uni gimin je development-rangko area-ni namdapgnina kam ka·enga ong·ode mamingba donuani gri ong·e kam ka·an baksana songdonggiparangna name talate on·chengna nanga,” ineba Sangma parakataha.
