SHILLONG: Voice of the People’s Party (VPP)-ni president Ardent Miller Basaiawmoit-ko tangka paisa jakkalsretanina NPP-ni dilgipa aro Rajya Sabha MP WR Kharlukhi-ni matnangani ja·man NPP-an a·dok sorkari aro Khasi Hills Autonomous District Council (KHADC)-ko chalaiengoba opposition membor-rangkosa matnangna jotton ka·skaenga ine VPP-ni ku·wattimgipa Batskhem Myrboh parakataha.
“Ia case-ko uamang (NPP) pilak dakgipa agency-rangchiba sandirokaichina. Bilo ong·enggipa manderangsa opposition membor-rangni kosako tangka paisa jakkalsretanina matnanganiara ka·dingani kattasa ong·aia,” ine Myrboh aganaha.
Gipin dolrangni kosako matnanganirangko dakna skang aro skiprakna skang, doltangni president Ardent Miller Basaiawmoit-ni kosako tangka paisa jakkalsretanina matnanganikon nichengchina gita adita salrangna skangsan, NPP-ni dilgipa aro Rajya Sabha MP WR Kharlukhi, VPP-ni dilgiparangko aganahachim.
“Kakketko ma·sichenggija gipinrangni kosako matnanganiara tol·e matnanganisan ong·aia. Iandakgipa kamrangkode tol·rakgipa manderangsa daka. District council-o manderangni tangka paisarangko jakkalsretanio bakrimaniko on·gipa mandeni skie on·aniko chingna nangja,” ine NPP-ni saksa dilgipa aro Rajya Sabha-ni MP WR Kharlukhi aganahachim.
“Ia case-o na·simang mamingkoba dongnuna nangani dongjagenchimode, na·simangni dilgipani kosako matnanggipa mandeko kachariona rimange ia case-ko matchotatbo,” ineba ua aganahachim.
KHADC-na a·arangko ra·anio tangka paisa jakkalsretani aro cha·bokanina VPP-ni president Ardent Miller Basaiawmoit-ni kosako adita salrangna skangsan, Umsning-ni gitcham MDC Donkupar Sumer, FIR ka·doangahachim.
