SHILLONG: Re·anggipa antio, dontonggija mikkarang waanganichi Garo Hills-o a·arang be·e aro chirang banne bang·a manderangan nokgri jamgri ong·na nangtokengon, neng·nikanirangko man·enggipa manderangna nanga gita dakchakanirangko on·na jotton ka·enga ine Budbar salo a·dok sorkari a·kangatskaaha.
Garo Hills-o iandakgipa a·selrang ong·anichi komibeoba sak 17 manderang siangna nangahani gimin aro bang·a manderangan nokgri jamgri ong·atako man·na nangahani gimin an·tangni suk ong·gijaniko parakatengon, uni minister ong·chengaoni Garo Hills-o ian bilongbatsranggipa a·sel ong·ani ong·aha ine a·dokni Revenue & Disaster Management Minister Kyrmen Shylla aganaha.
A·a be·dapanirangchi aro chi bananirangchi sak 15 manderang janggitangtangko gimaatna nangaha ine janapatengon, batanggimin salrango mikkarang waanganichi a·dok gimiko dam 246 songrang nangchakeaniko man·na nangaha aro te 665 nokrang nosto ka·ako man·an baksana sak 6,51,083 manderang neng·nikanirangko chagrongna nangaha ine Shylla parakataha.
Minister-ni aganani gitade, mikkarang dontonggija waanganichi komibeoba 347 nokdangrang nangchakeaniko man·aha, sak 6 manderang saknaaniko man·aha aro unbaksana mang 2000 na·tokrang aro mang 10 dingtang dingtang matburingrangba sina nangaha.
A·a be·ronggipa biaprango chel·chakna gita mai ja·kurangko de·na miksongenga ine sing·anina aganchakaniko on·angengon, iandake ong·telaigipa obostarangkode darangba agansona man·ja indiba iandake mikkarang jimgen ine sorkari ka·dongsojachim ine Disaster Management Minister parakataha.
Manderangna mikkarang wagniko name u·iatsamsoanirang dongjachimma ine sing·anina aganchakaniko on·angskaengon, manderangna man·a dipetde mikka wagniko u·iatsamsona sorkari jotton ka·aha ine Shylla aganaha.
Re·anggipa October-ni 5 tariko Chief Minister-ni dilanichi, a·dokni pilak deputy commissioner-rang baksa video conference gita tom·e chanchirimangaha ine janapatengon, pilak a·jarangkon nanga gita ja·kurangko de·china sorkari ge·etaniko on·atmanaha ine Disaster Management Minister parakataha.
