Chokpot jolo chi bananichi duko ga·akenggiparangna dakchakchina GSU, CM-ko mol·mola

TURA: Re·anggipa antio, Garo Hills gimikon mikkarang dontonggija waanganichi a·a be·ani aro chi bananirangko nikna man·angahaon, Chokpot jolrangoba chi bananichi nokgri jamgri ong·atako man·e neng·nikanirangko chagrongna nangenggipa manderangna pilak nanga dakchakanirangko on·china gita Garo Students Union (GSU) Chokpot regional unit, a·dokni Chief Minister Conrad K Sangma-ko mol·molataha.
Iani bidingo GSU Chokpot unit-ni dilgiparang, Budbar salo Chief Minister-ni Chokpot jolrango a·sel ong·gipa biaprangko nina re·angani somoio memorandum-ko on·ataha.
Chokpot jolrango chi bananichi manderangni nok-jamrang bang·en nosto ong·atako man·na nangahaon, Chokpot jolo donggipa Silkigre primary health centre (PHC)-ba chi bananichi nosto ong·atako man·na nangahani gimin ia health centre-ko gital dake tarie on·china gitaba GSU Chokpot unit, a·dokni Chief Minister-ko mol·molataha.
Rongrikgrimgre songona kabatbagipa aro Rene Badimagre songona kabatbagipa hanging bridge-rangba chirang bananichi pangpikako man·ahani gimin ia jolrango songdongenggipa manderangni namgnina ia songrango gital hanging bridge-rangko kabate on·china gitaba Chief Minister-ko mol·molataha ine GSU Chokpot regional unit-ni dilgiparang parakataha.
“Chokpot jolrango chi bananichi dingtang dingtang biaprang aro skulrang, jekai Chokpot Bazar, Mount Carmel School, Chokpotgre Baljim Memorial School, Gongganggre LP School, Silkigre RMSA School, Tengkigre LP School aro uandakgipa bang·a biaprangan nosto ong·atako man·tokahani gimin iandakgipa biaprangna aro skulrangna ta·raken dakchakanirangko on·china chinga Chief Minister-ko mol·molataha,” ine GSU Chokpot regional unit-ni general secretary Spensar R Sangma parakataha.
GSU Chokpot unit-ni parakatani gitade, chi bananio manderangni salanti re·rurana nanggipa Chokpot-Sibbari ramaba nosto ong·atako man·aha aro unbaksana Chokpot-oni Baromile-ona re·gipa ramaba apsan daken nosto ong·atako man·ahani gimin ia ramarangkoba ta·raken taripile on·china uamang Chief Minister-ko mol·molataha.