Purakhasia jolo chi bananichi duko ga·akenggipa manderangko CM grongea

TURA: Bristibar salo, a·dokni Chief Minister Conrad K Sangma, South West Garo Hills a·jani Purakhasia jolona re·angenba, re·anggipa antio mikkarang dontonggija waanganio chirang bananganichi neng·nikanirangko chagrongna nangenggipa dingtang dingtang songni manderangko grongeaha aro uamangna pilak nanga dakchakanirangko on·na ku·rachakangaha.
Purakhasia Block-o dingtang dingtang songni manderang baksa tom·aniko ong·atengon, ua manderangni neng·nikanirangko knatime ra·na aro sorkarini gita maidakgipa dakchakanirangko on·na man·gen, uko nina gita Purakhasia-ona re·baaha ine Chief Minister parakataha.
Manderangni neng·nikanirangko man·engmiting somoirango ta·raken dakchakanirangko on·ahani gimin ua dingtangmancha district administration, BDO-rang aro dingtang dingtang department-ni official-rangkoba mittelpilangaha.
Iana skang, South West Garo Hills a·jani Deputy Commissioner Hema Nayak-ba jinmana aganprakengon, chi bananirangchi nangchakeako man·gipa biaprang, badita nokdangrang neng·nikanirangko chagrongna nangahachim aro badita songrangna nangchongmotgipa bosturangko sokate on·na man·ahachim, uarangni bidingo report-ko Chief Minister-na on·angaha.
Badiaba nokdangrang ba manderang, iandake sorkarini on·enggipa bosturangko man·kujaenga ong·ode an·tangtangni VEC secretary-rangna ba BDO-rangna u·iatna man·gen ineba Chief Minister, songni manderangna aganangaha.
Je nokdangrangan chi bananio nokrangko chu·gimik gimaatna nangaha, uandakgipa nokdangrangna sorkari, gong lak 1.30 ka·e on·gen aro je nokrangan tong·sa ba adita nosto ka·ako man·aha, uandakgipa nokdangrangnaba nosto ong·ani kri tangka paisarangko on·anggen ineba Chief Minister ku·rachakaniko on·angaha.
Chi bananio an·tangtangni bagan bari, na·tok pokkri, jilla kaani aro uandake dingtang dingtang gam-jinrangko gimaatna nanggipa nokdangrangnaba hisapani ja·man Deputy Commissioner, niamo pangchake dakchakanirangko on·anggen ineba Chief Minister aganaha.
Manderangna dakchakanirangko on·engon, agre niamrangko rakdugae ja·rikjachina indiba nangani kri dakchakanirangko on·china gitaba Chief Minister, district administration aro dingtang dingtang department-ni officer-rangna ku·pattianiko on·angaha.
Chi bananganichi rama jal·langrangba bang·en nosto ka·ako man·na nangahani gimin ta·raken ia rama jal·langrangko taripile on·china gitaba Chief Minister, PWD-ko ge·etangaha.
Ja·mano ua chi bangipa biaprang aro nosto ong·ata man·gipa rama jal·langrangkoba niangjolaha.