TURA: Adita salrangna skang, Garo Hills gimikon mikkarang dontonggija waanganio, Dalu jolrangko chi bananichi neng·nikanirangko man·enggipa manderangna Bholarbhita-Chibinang joloni Bishal Tafsirul Qura’n Mahfil minggipa Muslim dolni manderangba, dingtang dingtang bosturangko ka·sae on·atenba dakchakanirangko on·angaha.
Ia dolni manderang, Dalu jolo donggipa dingtang dingtang songrang, jekai Dapgre, Kontokpara, Lower Bamonpara, Baburambil, Godagre, Upper Dapgre aro uandakgipa songni manderangna ma·manti bosturang, jekai merong, chira, dal, cha·ani to, kari, chini, biscuit, sabon, ringani chi aro uandakgipa bosturangko suale on·angaha.
Ia bosturangko suale on·anio, Bishal Tafsirul Qura’n Mahfil dolni manderangna, songni chadambe Balsrang Shira aro uni chadambe ripengrang dakchake on·angaha.
Mikkangchiba iandake manderangni nangan somoirango uamang man·a dipet dakchakanirangko on·angkugen ineba Bishal Tafsirul Qura’n Mahfil dolni dilgiparang parakataha.