TURA: East Garo Hills a·jao Nengkra-oni Williamnagar-ona dakanggipa PWD rama namsrangjahani a·sel re·ruraenggipa aro jolo songdongenggipa manderang neng·nikanirangko chagrongna nangtokenga ine Garo Students Union (GSU) Nengkra regional unit parakatenba, ia ramako ta·raken taripile on·china a·dokni Chief Minister Conrad K Sangma-ko didiataha.
Iani bidingo Chief Minister-na sedoatengon, Nengkra-oni Williamnagar-ona dakanggipa PWD ramao a·kolrara dakahani a·selan minute 20 ba minute 30-o sokna nanggipa ramako komibeoba minute 50-mang nangtokengani a·sel songni manderang, mongsongbate skul aro college-rangni re·enggipa chatro chatrirang neng·nikanirangko chagrongna nangtokenga ine GSU Nengkra regional unit-ni president Ringrang M Sangma parakataha.
“Ia rama namsrangjahani a·selan skul, college aro office-rangchi somoi gita sokna nangenggipa chatro chatrirang aro gipinrangba somoi gita sokna man·tokjaenga aro rama gimikan a·kolrara dakahani a·sel re·ruraenggipa pilak manderangan neng·nikanirangko chagrongna nangtokenga,” ine GSU Nengkra regional unit-ni president parakataha.
Ia ramao a·kolrara dakani a·selsan manderang neng·nikanirangko chagrongna nangenga ong·ja ine janapatengon, ia ramao be·na sie dongenggipa adita dolongrangba donga aro ramani mitam bakrango retaining wall-rang dongjani a·sel da·o gita mikka waani somoirango a·a be·anirangna kenchakna nanganiba ong·enga ine GSU Nengkra regional unit-ni president parakataha.
“Williamnagar-oni Dawagre-ona kilometer 7 ong·gipa ramakode taria matchotna siengahachim indiba Dawa Chipit Bazar-oni Nengkra Awe-onade ramakon tarina a·bachengsrangkuja,” ine Sangma parakatenba, ia ramako ta·raken tarie on·china Chief Minister-ko mol·molataha.
