SHILLONG: India a·songni Vice President Jagdeep Dhankar, mijal Budbar salo Shillong songjinmaona re·baaha aro Meghalaya Skill & Innovation Hub-na pangchakaniko songe on·angaha.
Vice President-ni Shillong songjinmaona re·bae pangchakaniko songe on·anganio, a·dokni Governor CH Vijayashankar, Chief Minister Conrad K Sangma, Health Minister Ampareen Lyngdoh, Education Minister Rakkam A Sangma, a·dokni Chief Secretary DP Wahlang aro gipinrangba dongpae bak ra·angaha.
Ia Meghalaya Skill & Innovation Hub-ko New Shillong-ni acre 6.54 ong·gipa a·ao gong crore 77.5 korosrangchi rikna siengachim.
Ia tom·anio a·songni Vice President Jagdeep Dhankhar, jinmana aganprakangengon, chadamberangni changa sapanirangko nirok sandina aro namdapatna gita dingtang dingtang kamrangko a·bachengatenganina a·dokni Chief Minister Conrad K Sangma-ko mittelpilangaha.
India a·songo chubatsranggipa President-ni kamko Tribal me·chikan jako ra·enga aro Meghalaya a·doko DGP-ni kamkoba Tribal me·chikan jako ra·engani gimin ian India a·songni dal·roroanio dingtanganiko mesokani ong·enga ineba Vice President aganaha.
Meghalaya a·doko Skill & Innovation Hub-ko kulianiara bading chiwalani kamrangko tang·doatanio dakchakani ong·gen ine janapatengon, ia centre-ko kulianichi a·doko kam ka·giparangkoba bang·bate ong·katatna dakchakani ong·gen ine Vice President aganaha.
Dingtang dingtang program-rangko a·bachengatanichi a·songni Prime Minister Narendra Modi, chadamberangna janggi tangani cholrangko oe on·aha ineba Dhankhar aganaha.
Mikkang bilsi bongani gisepo a·songni lak 5 chadamberangko dingtang dingtang kamrango namdapatna gita gong crore 60,000-ko chamaha ineba Vice President parakataha.
“Chadamberangni changa sapanirangko namdapatanian ia sal somoirango nangchongmotgipa kam ong·enga,” ine ua aganaha.
Iana skang, a·dokni Governor CH Vijayashankar-ba jinmana aganprakengon, chadamberangna janggi tangani cholrangko on·na gita a·doko man·enggipa dingtang dingtang chol aro bilrangni gimin janapangaha.
Ia tom·anio, a·dokni Chief Minister Conrad K Sangma-ba jinmana aganprakangengon, chadamberangan a·dokni bil ong·a aro ia bilko nambatatna gita sorkari ia skill & innovation hub-ko kulienga ine aganaha.
Meghalaya a·doko songdongenggiparangoni 85 percent-de bilsi 45-na komigiparangan ong·a ine janapatskaengon, chadamberangan a·dokni dal·batsranggipa bil aro gam ong·ani gimin chadamberangni bilrangko tarina gita sorkari dingtangmancha program-ko a·bachengataha ine Chief Minister parakataha.
A·dokni dal·roroanio chadamberangba on·gilpana man·na gita sorkari, dingtang dingtang program-rangko a·bachengate chadamberangna training-rangko on·enga ineba ua aganaha.
