TURA: New Bhaitbari post office-ko batanggimin jarangonin chipe donengani a·sel ia jolrango donggipa manderang, dingtang dingtang kamrangko ka·anio neng·nikanirangko chagrongna nangtokenga ine All Meghalaya Minority Students Union (AMMSU) parakatenba, jolo songdongenggipa manderangni namgnina ia post office-ko ta·raken kulipilchina didiataha.
AMMSU-ni parakatani gitade, ia post office-o kam ka·enggipa peon siangaonin New Bhaitbari post office-ko batanggimin jagimik chipe donaiaha aro ia post office-ko chipe donengani a·selan Bank passbook, ATM card, Pan Card, Aadhar card aro uandake nangchongmotgipa lekkarangko ra·chakanio aro watanio neng·nikanirangko chagrongna nangtokenga.
“Ia office-o kam ka·enggipa peon siaonin ia New Bhaitbari post office-o kam ka·gipa mande dongjae, batanggimin jaonin ia post office-ko chipe donenga aro iani a·sel jolo songdongenggipa manderangsa neng·nikanirangko chagrongna nangtokenga,” ine AMMSU-ni president parakatenba, ia post office-o kam ka·giparangko rakkie, ia post office-ko ta·raken kulichina Postal official-rangko didiataha.
