EGH-ni producer group-rangna FOCUS program-ni cheque-rangko sualata

WILLIAMNAGAR: East Garo Hills a·jani Samanda, Songsak aro Dambo-Rongjeng Block-ni ning·o game ge·e cha·giparangna aro producer group-rangna Sukrobar salo, a·dokni PHE Minister Marcuise N Marak, FOCUS program-ni cheque-rangko Williamnagar-ni DC Park-o suale on·angaha aro ia tom·anio, East Garo Hills a·jani Deputy Commissioner Vibhor Aggarwal, ADC Ripamchi N Sangma, block damgittam-ni BDO-rang aro dingtang dingtang department-ni official-rangba dongpae bak ra·angaha.
Game ge·e cha·giparangna aro producer group-rangna FOCUS-ni cheque-rangko suale on·anganio a·dokni PHE Minister, jinmana aganprakangengon, a·doko songdongenggipa manderangni mongsonggipa kamara game ge·e cha·anian ong·ani gimin Meghalaya sorkari, game ge·e cha·enggipa manderangna tangka paisani gita dakchakanirangko on·enga aro Meghalaya a·dokko 10 billion dollar economy ong·atanian Chief Minister Conrad K Sangma-ni niksamsoani ong·engani gimin game ge·e cha·giparangni aro producer group-rangni man·dapanirangko bariatna gita sorkari dingtang dingtang ja·kurangko de·angkugen ine parakataha.
A·doko gama ge·ani kamrangko tang·doatna gita sorkarini ra·gatgipa dingtang dingtang scheme aro project-rangni gimin talataniko on·angengon, Chief Minister-ni niksamsoaniko chu·sokatna gita sorkarini on·enggipa tangka paisarangko name jakkalchina gita Marak, game ge·e cha·giparangko aro producer group-rangko didiangaha.
Ia program-ko ong·atanio, East Garo Hills a·jani ADC Ripamchi N Sangma-ba jinmana aganprakengon, FOCUS program-ni ning·o East Garo Hills a·jani dol 464 producer group-rangna Meghalaya sorkari, tangka paisani gita dakchakanirangko on·aha aro East Garo Hills a·jao game ge·ani kamrang dingtanganiko nikna man·engaha ine aganaha.
Ia salni bako a·dokni PHE Minister, CM Impact Program-ni ning·o Williamnagar-ni wilwilao donggipa dingtang dingtang skulrangna guide book-rangkoba suale on·angjolaha.
Ia tom·anio rimchaksoani kattarangko MBMA-ni District Program Manager Lisbeth A Sangma aganangaha aro Janisa Marak, mittelpilani kattarangko aganangskaaha.