TURA: Adita salrangna skang, Bangladesh a·songni Babelakona minggipa songo, A·chik nokdang ge·gniko chadrapanina A·chik Conscious Holistically Integrated Krima (ACHIK) dol raken jegalataha.
Koborko on·ani gitade, re·anggipa October-ni 15 tariko, Bangladesh a·songni Babelakona minggipa songo, Bisso Mree, Eva Mree aro Stanton Mree minggipa manderangni nokdangko man·chape nokdang ge·gniko ma·sina man·gijagipa manderang chadrapahachim.
Iani bidingo Kolkata-o donggipa Bangladesh People’s Republic-ni Deputy High Commission-na badi ka·e sedoatengon, “Iandake Bangladesh a·songo songdongenggipa A·chik nokdangrangko chadrapanichi ua biapo songdongenggipa A·chik manderangna kenjagokaniko ra·baaha. Iandake a·songo songdongenggipa manderangko chadrapaniara mandena on·gimin bilko pe·anisan ong·aigija Bangladesh a·songo songdongenggipa A·chikrangni kosako onchepaniko mesokaniba ong·aha,” ine ACHIK Krima Council parakataha.
Iandake Bangladesh a·songo songdongenggipa A·chik nokdangrangko chadrapanina suk ong·gijaniko parakatengon, dos dakgipa manderangko ta·raken rim·china aro mikkangchi iandakgipa a·selrang ong·taijana gita ia a·selni bidingo sandirokanirangko dakatchina gita ACHIK Krima Council-ni dilgiparang didiataha.
Bangladesh a·songo songdongenggipa A·chik aro pilak chonchongipa Tribal jatrangko chel·chakchina gita ACHIK dol, dingtangmancha Bangladesh sorkarikoba didiataha.