SHILLONG: Re·baenggipa November 13 tariko ong·atna sienggipa Gambegre Assembly constituency-ni by-election-na sorkarini dingtang dingtang kam aro bilrangko jakkalsretenga ine Trinamool Congress (TMC) aro dingtang dingtang opposition dolrangni matnangako National People’s Party (NPP) jegalatskaenba, election-na model code of conduct (MCC)-ko ra·gatna skangsa uamang, manderangni namgnina sorkarini dingtang dingtang cholrangko jakkalaha ine parakataha.
“Opposition dolrangde pangnan matnangaigen indiba chinga sorkariko chalaienggipa party ong·e, MCC-ko ra·gatna skangsa Gambegre constituency-ni manderangna nanganirangko on·aha. Manderang dabianirang donggenchimode chinga niattelna nangaon ga·akaia,” ine a·dokni Cabinet Minister aro NPP-ni working president Marcuise N Marak aganaha.
“JJM-ni kamrangkoba name ka·jahani gimin kamrangko nipiltaichina gita officer-rangko ge·etaniara angani daitoan ong·a. Indide iano maia ong·gijani donga?” ineba Marak sing·doangaha.
NPP-ni kosako matnanganirangko dakengani gimin MDA-o bakrimenggipa BJP-ko jegalatskaengon, “Uamangni matnanganirango maming kakket ong·ani dongja aro ian election-na skang manderangko salna chalakki dakanisan ong·aia,” ine NPP-ni working president parakataha.
Gambegre by-election sepangbaroroengahaon mingsani ja·man mingsa dake BJP-ni matnanganirangba batrorobaengaha ine janapatengon, “Uamang (BJP) sorkario ong·engoba chingni gisepo election-na skang bakrimanirang dongja aro iani giminsa uamang, Gambegre-ni manderangna mamingkoba mesokna dongjae NPP-ni kosako matnanganirangko dakskaenga,” ine Marak aganaha.
Chi banani somoio nangchongmotgipa bosturangko man·na gita NPP, Garo Hills-ni badiaba badiaba biaprango manderangko NPP baksa bakrimchina aganenga ine adita salrangna skangsan BJP matnangatahachim.
“Garo Hills-o nangchongmotgipa bosturangko man·jaengani a·selde politics-sa. Uamang (NPP) dakchakanirangko man·na gita pilakkon NPP-ni membor ong·china nangnikenga aro ian kraani ong·ja,” ine adita salrangna skang, BJP-ni state vice president aro Tura-ni MDC Bernard N Marak aganahachim.