AMPATI/TURA: India a·songni gipin biaprango gitan Police Commemoration Day-ko Sombar salo, Garo Hills-ni dingtang dingtang biaprangoba maniangtokaha.
Ia Police Commemoration Day-ara dingtangmancha 1959 bilsini October 21 tariko Ladakh-ni Hot Spring-o, a·songni simarangko chel·chakenggipa sipairangko Chinese Army-rangni chadrapanio so·ota man·gipa sak 10 Indian sipairangko gisik ra·na gita manirongenggipa sal ong·achim.
Ia salko South West Garo Hills a·jaoba District Police-ni gita Superintendent of Police (SP) office-o maniangaha aro ia salko manianio, sianggipa sipairangna mande ra·pilskaani chin gita pulrangko done, gun salute-koba dakangaha.
Ia salko manianio, South West Garo Hills a·jani SP Billy Graham Marak, ia salko maniani bidingo talate on·angengon, 1959 bilsio Ladakh-o Chinese sipairangko ka·dongbee warachaksogipa Central Reserve Police Force (CRPF) sipairangoni sak 10 so·otako man·na nangaha aro ia sipairangni an·tangtangko a·songna on·kange dakgrikaniko gisik ra·na aro ia sipairangna mande ra·pilskaaniko daknasa ia salko manirongenga ine parakataha.
Apsan daken, East Garo Hills a·jaoba ia Police Commemoration Day-ko Williamnagar Police Reserve-o maniangaha aro ia salko manianio, sianggipa sipairangna pulrangchi mande ra·pilskaaniko dakangenba, uni ja·man Shok Parade Commander Richmond R Marak-ni dilanichi gun salute-koba dakangaha.
Ia salko manianio, East Garo Hills a·jani Deputy Superintendent of Police (DSP) Anthony Ch Momin, Police Commemoration Day-ko maniani bidingo talate on·angenba, a·songtangna janggirangko on·chakgipa sipairangni kamrangna mittelpilangaha.
Ia salko manianio dongpae bak ra·anggipa gipin manderangara, Deputy Superintendent of Police (Crime) Subir Sangma, Deputy Superintendent of Police (DSP) Howard K. Marak, 5th MLP Battalion-ni Assistant Commandant, Civil Defence Home Guard-ni Assistant Commandant, dingtang dingtang officer-rang aro gipin sipairang ong·a.
