SHILLONG: Samagra Shiksha Abhiyan (SSA) skulrango skigiparangni skulrangona re·baaniko ma·sina man·na gita a·dok sorkari, skigiparangni salanti attendance-na Teacher Information Management System (TIMS) application-ko nangtelgipa ong·ataha.
Iani bidingo State Education Mission Authority of Meghalaya (SEMAM) u·iataniko on·atengon, mitam SSA skulrango skigiparang, an·tangtangni skulrangona re·baaniko name report on·jaengani a·sel skulrangko chalaianio parak ong·anirang dongjaengani gimin pilak skigiparangan an·tangtangni attendance-ko mesokna TIMS App-o register ka·e jakkalna nangtelgnok ine parakataha.
Ia app-ko jakkalanichi skigiparangni attendance record-ko nambate chalaina man·gnok aro ia app-ko Payroll & Employees Management System (PEMS) gita skigiparangni dormaharang baksa link ka·gnok ine SEMAM u·iataha.
“Skigiparangko skulona re·baatna gita ia TIMS appa-ara namen nangchongmotgipa kol gita ong·enga aro ia app-an attendance record-ko dormaharang baksa bak ong·atgnok,” ine SEMAM-ni State Project Director Swapnil Tembe parakataha aro ia ge·etaniko pilak Deputy Commissioner-rangna aro District Mission Coordinator-rangnaba on·ataha.
SSA skulrango skigiparang, an·tangtangni dormahako 100 percent-chi bariatchina aro sak 13,000 skigiparangko State Implementation Society-oniko Education department-ona apjitatchina dabie, jingjengatanirangko dakengachim ine nikna man·a.
Meghalaya sorkari, tangka paisani gita neng·nikanirangko chagrongna nangengani gimin SSA skulrango skigiparangni dabianirangko changsanode chu·sokatna man·jawa ine adita salrangna skangsan, a·dokni Education Minister Rakkam A Sangma parakatahachim.
SSA program-de India sorkarini programsa ong·a aro SSA skigiparangni dormahako on·anio a·dokni gitade 10 percent-san bak ong·paaia ine janapatengon, 2018 bilsi dipetan ma·mong sorkarini bakkoba bilsiantian 5 percent ka·e komiroroatengaha ine Sangma aganahachim.
“Da·o ma·mong aro a·dok sorkarini sualgrikani 70 percent aro 30 percent ong·aha aro mikkang bilsiode ian 65:35 ong·gnok aro bakan 50:50 ong·gnok,” ine Education Minister talataniko on·angaha.
Sak 10,000 adhoc skigiparang aro sak 13,000 SSA skigiparang apsan somoion dormahako bariatchina dabiengani gimin tangka paisani gita bang·en neng·nikanirangko chagrongna nangenga ine janapatskaengon, skigiparangna dakchakanirangko on·na gita uamang cholrangko nienga ineba Sangma aganahachim.