TURA: South Garo Hills a·jaona a·dokni Governor re·bana skang, rama tarianio dingtang dingtang bosturangko salruraenggipa garirangoniko police-rang, tangka gile ra·enga ine matnanganirang ong·katahani gimin iandake matnanganirangara kakket ong·ama ong·ja, uko tale ma·sina gita sandirokatchina A·chik Conscious Holistically Integrated Krima (ACHIK) Southern Zone (SZ), a·dokni Home Minister-ko didiataha.
ACHIK-SZ-ni parakatani gitade, South Garo Hills a·jani ramarangko tarina gita ma·manti bosturangko salruraenggipa garirangoniko Siju police station aro Rongdik dolongo donako man·enggipa police-rang, truck gari bolprakoniko gong 1000 ka·e dabie ra·enga ine matnanganirang ong·katahachim.
“South Garo Hills a·jaona a·dokni Governor re·baengani gimin ramarangko tarisoanio dingtang dingtang bosturangko salruraenggipa truck garirangoniko batanggimin jarangonin dingtang dingtang biaprango, gari bolprako gong 1000 ka·e gile ra·enga ine chinga koborko man·soaha. Nangchongmotgipa bosturangko salbaenggipa garirangonikoba ia biaprango tangka gile ra·engani a·selan rama tarienggipa contractor-rang aro truck garirang neng·nikanirangko chagrongna nangtokenga,” ine ACHIK-SZ-ni dilgiparang parakatenba, iani bidingo ta·raken inquiry-ko dakatchina a·dokni Home Minister-ko didiataha.
Niam retiko nirokgipa aro rakkigipa official-rangan iandake tangka paisarangko gile ra·aniara namen kragijani ong·a ine janapatengon, South Garo Hills a·jao rama jal·langrangko namdapatna kam ka·enggipa manderangoniko iandake tangka paisarangko gile ra·engani a·selan a·jani manderangnasa nangchakeaniko ra·baskaenga ine ACHIK-SZ parakataha.
Ia jolrango niam gri badingsrukanirangko aro ong·gija kamrangko nikna man·engani gimin police officer-rangni tangka paisa gile ra·aniko ta·raken namatjagenchimode mikkangchi ia jolrango obostarang namjabatenggen ine janapatskaengon, iani bidingo ta·raken inquiry-ko dakenba, dos donggipa official-rangni kosako rakgipa ja·kurangko de·china gita ACHK-SZ, a·dokni Home Minister-ko didiataha.
