BAGHMARA: Meghalaya a·dokni skanggipa Chief Minister Captain Williamson A Sangma-ni chang 34-gipa siani salko Sukrobar salo, South Garo Hills a·jani Baghmara-o donggipa Capt Williamson Memorial Park-o maniangaha.
Ia salko South Garo Hills District Administration, Ampang Mangsang Mahari baksa nangrime manidilangaha aro ia salko manianio, Meghalaya Legislative Assembly-ni Speaker Thomas A Sangma, a·dokni Education Minister Rakkam A Sangma, Education Department-ni Adviser HM Shangpliang, MLA-rang, dingtang dingtang official-rang aro South Garo Hills a·jani dingtang dingtang biaprango donggipa manderangba bak ra·angtokaha.
Ia salko manianio, Meghalaya Assembly-ni Speaker Thomas A Sangma, jinmana aganprakangengon, a·dokni skanggipa Chief Minister Capt WA Sangma-na mande ra·pilskaaniko dakangenba, ia salosan uko gisik ra·aigija, a·dokni namroro silroroanina uni kam ka·anirangko daksningna nanga ine didiani kattarangko aganangaha.
Ia salko manianio, Chokpot MLA SN Sangma-ba jinmana aganprakengon, politics-ni itihaso Capt Williamson Sangma sagini on·gilanirangko gisik ra·atpilangaha.
Ia salko maniani bak gita Dilsa bibraoni Baghmara bazaar-ona dakanggipa ramako Capt Williamson Road ine mingna tik ka·angaha aro iako Meghalaya Assembly-ni Speaker, oprake on·angaha.
