Capt Williamson Memorial College-ni gital building-na pangchakaniko songa

BAGHMARA: Capt Williamnson Sangma-ni chang 34-gipa siani salo, Baghmara-o donggipa Capt Williamson Memorial Govt College-ni bilsi 33 gapaniko maniani bak gita ia college-na gital academic building-ko rikna gita Sukrobar salo, Meghalaya Legislative Assembly-ni Speaker Thomas A Sangma-ni jakchi pangchakaniko songe on·angaha.
Ia gital academic building-na ian Rashtriya Uchchatar Shiksha Abhiyan (RUSA)-ni ning·o gong kror 5 tangkarangko chamdape on·enggipa ong·achim.
Ia college-na gital building-ko rikna pangchakaniko songe on·anio, a·dokni Education Minister Rakkam A Sangma, Baghmara-ni MLA Kartush R Marak, Chokpot-ni MLA SN Sangma, Education department-ni Adviser HM Shangpliang, MDC Natwal S Marak, Education Secretary Ambrose Marak, Higher & Technical Education-ni Director HDB Sangma aro gipinrangba bak ra·angtokaha.
Ia tom·anio, a·dokni Education Minister Rakkam A Sangma, jinmana aganprakangengon, ia college-ni academic building-na Rashtriya Uchchatar Shiksha Abhiyan (RUSA)-ni ning·o gong crore 5 tangkarangko chamdape on·aha ine parakatenba, chatro chatrirangko mande ong·atanio skigiparangni dakna nanggni kamrangni bidingo agan-talatanirangko on·angaha.
Ia college-ni gital website-ko kulina aro college building-ko dal·batatna man·engani gimin an·tangni kusi ong·aniko parakatengon, dingtang dingtang porikkani result-rango South Garo Hills a·jani chatro chatrirang tang·dona man·kujaengani gimin an·tangni suk ong·gijaniko parakatskaenba, South Garo Hills a·jani pilak skulrango skie on·aniko namdapatchina gita skigiparangko Education Minister didiangaha.
Result-rang namjaengani gimin saksa sakgipinko matnanggrike dongaijachina aro South Garo Hills a·jao result-ko nambatatna gita pilakkon rake kam ka·chinaba Sangma didiangaha.
Ia tom·anio, mongsonggipa ong·e sokgipa Meghalaya Assembly-ni Speaker Thomas Sangma-ba, jinmana aganprakangengon, ia salara college-ni bilsi 33 gapaniko maniani aro apsan somoion college-na gital building-ko rikna oprakani ong·engani gimin ia college-nasan ong·aigija South Garo Hills a·ja gimiknan gisik ra·beani sal ong·enga ine aganaha.
College-o skie on·enggiparangko aro gipin kam ka·enggiparangko gisiko nange dangdike on·engani gimin mittelpilangengon, ia college-o poraienggipa chatro chatrirangkoba chu·sokgiparang ong·na gita gisiko nange poraichina Sangma didiangaha.