TURA: South West Garo Hills a·jani Mahendraganj jolo donggipa Baksalpara songo Science & Commerce College baksana Ampati Kebolpara songo Engineering College-ko rikanirang da·onan matchotchipkujaenga ine Niksamso Garo Community Organisation (NGCO) parakatenba, iani bidingo ta·raken inquiry-ko dakchina a·dokni Chief Minister aro Education Minister-o dabiangaha.
NGCO-ni parakatani gitade, Mahendraganj-o rikenggipa Science & Commerce College-na NLCPR-ni ning·o gong kror 36.31-ko aro Ampati-o rikenggipa Engineering College-naba NLCPR-ni ning·on gong kror 41 tangkarangko chame on·ahachim indiba ia college-rangko rika matchotgija baditaba bilsirangonin galchipe donengahachim.
“Chingni am·sandie nianio man·ani gitade, ia college damgnina NLCPR-ni ning·o krorni kror tangkarangko sorkari chamatahachim indiba ia college-rangko rikenggipa contractor-rang da·alonan matchotate on·kujaengani gimin chinga namen duk ong·a. Ian chatro chatrirangni namgnina chame on·atgipa tangka paisarangko rusie galanisa ong·enga,” ine NGCO-ni dilgiparang parakatenba, ia college damgniko rikani bilsichet ong·pilengahaoba maini a·sel da·onan matchotchipkujaenga ine a·dok sorkario sing·doataha.
Kamrangko a·dok sorkarini gita nirok sandianirang dongjani a·selsa ia project-rangko jako ra·e kam ka·enggipa contractor-rang, kamrangko somoi gita matchotatchipjaenga aro tangka paisarangko jakkalsretenga ineba NGCO matnangataha.
Iani bidingo sorkari ta·raken inquiry-ko dakjagenchimode an·tangtangan am·sandianirangko dakenba, kachariona ra·anggen ineba NGCO mikrakataniko on·angaha.
Ia college damgnini bidingo adita salrangna skangsan, A·chik Holistic Awakening Movement (AHAM) South Western Zone (SWZ)-ni gitaba a·dokni Chief Minister Conrad K Sangma-o sing·sandiatahachim ine nikna man·a.
AHAM-SWZ-ni president Wester G Sangma-ni parakatani gitade, ia college damgninan a·dokni gitcham chief minister Dr Mukul M Sangma, 2017 bilsini November 22 tariko pangchakaniko songe on·angahachim indiba ia college damgniko matchotchipkujaengani gimin uamang adita salrangna skang ia biaprangona re·ange nion, ia biapo kam ka·giparangkoba, kam ka·ani bosturangkoba aro nirokenggipa manderangkoba nikbajahachim.
