SHILLONG: Early Childhood Development Mission-ni ning·o bi·sarangna aro sok kanenggipa ma·giparangna skie ra·ani cholrangko on·na gita Meghalaya sorkari, dam 2000-mangni gita Anganwadi centre-rangko Early Childhood Development Centre dake ra·doatna tik ka·angaha.
Iani bidingo a·dok sorkari Sombar salo, dingtang dingtang dolrang aro department-rang baksa tom·anirangko ong·atangaha.
Ia centre-rango bi·sarang, an·o donggipa aro sok kanenggipa ma·giparang, detangtangna nambate cha·ani ringanirangko on·na man·na gita pilak dakchakanirangko man·gen.
Sok kanenggipa ma·giparangni dingtang dingtang neng·nikanirangko chel·chakna gita a·dok sorkari, IIT Bombay baksaba bakrimaha aro uamangan sok kanenggipa ma·giparangna skie on·anirangko dakgen.
Iani bidingo talataniko on·angengon, a·dokni dam 2000 Anganwadi centre-rangko da·o bilsignini gisepon ECD centre-ona ra·doatgen aro ia centre-rangko C&RD-ni dakchakanichi rikgen ine Health department-ni Principal Secretary Sampath Kumar parakataha.
Early Childhood Development program-ni ning·o sak 40 trainer ba skigiparangna training-rangko on·manaha ineba Kumar parakataha.
ASHA aro Anganwadi worker-rangna dingtangmanchagipa kolrangko on·na sienggipa ‘Umeed’-ba ia program-o sorkari baksa bakrimenga aro ia kolrangan bi·sarangni an·seng baljokani aro namgipa cha·ani ringanirangko nirokanggen.
Ia mission-ni miksonganiara, atchidaldaloni bilsi 8 ong·gipa bi·sarangna, an·o donggipa me·chikrangna aro sok kanenggipa me·chikrangna an·seng baljokaniko on·ani, namgipa cha·ani ringanirangko on·ani aro pilak nanga dakchakanirangko on·anian ong·enga.
