TURA: Gambegre by-election-na susaanio Congress dolni dilgiparang meligrikna man·jaenga ine adita salrangna skang, badiaba badiaba news channel-rango kobor on·aniko West Garo Hills District Congress Committee (DCC) raken jegalataha.
West Garo Hills DCC-ni general secretary Edmund S Sangma-ni parakatani gitade, adita salrangna skang, Gambegre by-election-na Congress dolni candidate Jingjang M Marak-ni nomination file ka·ani somoio Tura-ni MP aro Gambegre-ni gitcham Congress MLA Saleng A Sangma dongpajahani gimin Congress dolni gisepo meligrikna man·jaenga ine badiaba news channel-rango kobor on·ahachim.
Iandake kobor on·aniko jegalatengon, Member of Parliament (MP)-kode party candidate-rangni nomination file ka·ako nitimchina gita manderang seokjaha indiba manderangni namgnina kamrangko ka·chinasa seokaha ine West Garo Hills DCC-ni general secretary parakatenba, party candidate-ni nomination file ka·anio Saleng Sangma-ni dongpagijaniara maming dakeba party-ni gisepo melina man·gijaniko mesokani ong·ja ine talataniko on·angaha.
“Ua somoio Tura-ni MP, dingtang dingtang songrangona wenange, manderangni neng·nikanirangko ma·sie ra·na gitasa agangrikanirangko dakengachim. Nomination file ka·a matchotani ja·man dingtangmancha Gambegre-o Prayer meeting-ko ong·ataha aro uanonade Tura-ni MP Saleng Sangma sokange tom·anio bak ra·epaaha,” ine West Garo Hills DCC-ni general secretary parakataha.
Gambegre by-election-o Meghalaya Pradesh Congress Committee (MPCC)-ni working president Deborah C Marak, an·tangba susapana miksongani dongachim ine kobor on·anikoba West Garo Hills DCC raken jegalataha aro Gambegre by-election-o susana gita uni bimingko mingon ua (Deborah) an·tangan candidate ong·na gita jechakaha ine talataniko on·angaha.
“Gambegre L/A Constituency-ni bye-election-o MPCC-ni working president Deborah Marak-ba Congress candidate ong·e susana nangnikanirang dongachim ine kobor on·aniba kakket ong·ja maina candidate-ko seokani bidingo chanchirimengmiting somoion ua candidate ong·na jechakaha. Uni gimin iandake koborko on·aniara chanchichipe seanisan ong·aia aro maming dakeba kakket ong·ani dongja. Ian badiaba candidate-na aro political party-na chake, party-ni gisepo dilsretaniko ra·bana jotton ka·anisan ong·aia,” ine West Garo Hills DCC-ni general secretary talataniko on·angenba, Gambegre by-election-o party-ni candidate Jingjang M Marak-ko chegipa ong·atna party-ni membor pilakan ku·cholsan ong·enga aro kamko ka·na kusi ong·enga ine parakataha.
