SHILLONG: Ramaona changni chang ong·kate jingjengatgipa teachers ba skigiparangni chagrongna nanggipa neng·nikanirangni bidingo sorkarini kosako VPP matnange dongengon, A·doko skie on·ani a·bao dangdike on·enggipa skigiparangni neng·nikanirangko namatna gita uamango maiba namatani chol dongode uamangoniko knae ra·na gita ua VPP baksa agangrikna sikenga ine Education Minister, Rakkam Sangma uni skaniko parakaha.
Jedakgipa kamrangni bidingoba ong·chong, ramaona ba a·pal ong·kate jingjengataniko dakani bidingo darangkoba champengna man·ja ine Rakkam Sangma Butbaro aganaha.
Indake ong·engon, VPP-ba iani bidingo aganchaknagipan ong·ani gimin iani bidingo ua jesomoioba, je kam kattani giminba VPP baksa agangrikaniko dakna sengenga ineba Sangma aganaha.
“Uamango haida nambata cholrang dongengnaba donga, unigimin kam ka·tonagipa ong·ode uamangni jedakgipa ku·pattianikoba ra·chakna kusi ong·begen” Education Minister aganaha.
Indakeba nikatna man·a je, batanggimin adita somoirangna skang SSA Teacher-rang sal 20 batangpile, uamangni dormaha-ko bariatchina gita jingjengate dabiangaha, jeon dolgipinara uamangni kamrangna naljokaniko ba job security-ko on·china gita dabiangahachim.
