SHILLONG: Re·anggipa April jao ong·atanggipa Tura Lok Sabha election-o Congress dol altuaen chegipa ong·na man·ahani gimin da·o November 13 tariko ong·atenggipa Gambegre by-election-oba apsan jaduchin chu·sokgipa ong·na man·gen ine Meghalaya Pradesh Congress Committee (MPCC)-ni president Vincent H Pala, an·tangni ka·dongchakenganiko parakataha.
Gambegre by-election-ko sawa chegen, da·o dipet manderangni gisepo jijaanirang ong·engon, sorkariko chalaienggipa party-rangde pangnan dal·dale kattako aganronga indiba Congress dol, Tura Lok Sabha MP election-o gitan Gambegre by-election-oba apsan result-ko ra·bana man·aigen ine Pala aganaha.
Tura Lok Sabha election-o Congress dolni candidate Saleng A Sangma, 3,83,919 vote-rangko man·e, 2,28,678 vote-rangko man·rikgipa National People’s Party (NPP)-ni Agatha K Sangma-ko altuaen chena man·ahachim ine nikna man·a.
Kamchi mesokana bate ku·sikchi agannade pangnan altubataia ine janapatengon, Gambegre by-election-o chu·sokgipa ong·na gita Congress dol rakbate kamrangko ka·na nangenga ine Pala parakataha.
Garo Hills-o Congress dolde bon·angengahani gimin Gambegre by-election-o ka·dongani dongjaha ine NPP aganahani gimin MPCC-ni president, ia kattarangko aganskaaha.
Gambegre-ona ua Sombar salo re·baenga ine parakatengon, uni knasoani gitade ia by-election-o Congress, TMC aro NPP-ni gisepo susagrikbatenga ine Pala aganaha.
Indake ong·genchimoba da·o dipet Gambegre by-election-ni bidingo aganna namen seng·gnangdugakuenga aro Gambegre-ona re·ange nigenchimosa ua nambate ma·sina man·gen ine Pala talataniko on·angskaaha.
Gambegre by-election-o Congress dol, Gambegre-ni gitcham MLA Saleng A Sangma-ni melibatgipa ripeng aro Congress membor Jingjang M Marak-ko susaatengachim.
Ia by-election-o NPP-ba Chief Minister Conrad K Sangma-ni jikgipa Mehtab Chandee A Sangma-ko, Trinamool Congress (TMC)-ba Zenith Sangma-ni jikgipa Sadhiarani M Sangma-ko aro BJP-ba Tura-ni MDC aro BJP-ni state vice president Bernard N Marak-ko susaatenga.
Ia by-election-o Independent candidate-ba sakgni susaenga.
 |
ReplyForward
|