SHILLONG: Party-oni ong·katgipa sakgittam MLA-rangni kosako disqualification petition ba ra·galchina mol·mole dorkasto on·gipana state Congress, da·omangba Asemblhy Speaker office-oniko maming aganchakaniko man·kujaenga.
Meghalaya Pradesh Congress Committee’-ni legal cell-ni chairman Kimphang V Kharlyngdoh, iani gimin koborna u·iatengon, ‘party, ia mamlako chanchirimaniko dakenga’ ine aganaha.
“Charles Marngar aro Gabriel Wahlang- uamangko ra·galchina chinga mol·molaniko on·na September 9 tariko tik ka·aha. Celestine Lyngdoh-ko ra·galchina September 15 tariko petition-ko on·aha. Indiba Speaker Thomas A Sangma, dorkastoo tik ong·gijanirang dongani gimin ra·chakjaha aro watpilataha,” ine Kharlyngdoh aganaha.
Dorkastoo bang·gija tik ong·gijanirang donga, jekai spelling-o gualani donga, uni gimin sesretanirangko name dake setaie on·china ge·etaha. Petition ba dorkastoko October 18 tariko Speaker-na on·taiaha.
“Charles aro Gabriel-ni kosako lekka segipaosan gualani dongachim indiba Celestine-na segipa lekkao maming sesreta ba gualani dongja,” ine Kharlyngdoh aganaha.
Mol·molani lekkako on·mitingo Speaker iano dongjachim ua US-ona re·angachim. Indiba da·ode ua re·bapiljokchim, da·onan petition-ni gimin mamingkon agankujaenga.
“Uni gimin chinga Speaker-ni office-oni agangrikaniko (official communication)-ko nichake dongenga. Re·baenggipa antirangonan Speaker, maming ja·kuko de·ja ong·doe chinga niamo pangchake ja·ku de·angskagen, chinga Delhi-oni legal team baksa agangrikchengen aro ja·ku de·gen,” ine Kharlyngdoh aganaha.
Congress-oni ong·kate National People’s Party-ona napanggipa sakgittam MLA-rangni ra·galchina lekka on·gipako Speaker, a·dokni Advocate General-na uni raiko ra·na gita sing·ataha.
Congress-oni saksamangmang dongenggipa MLA Ronnie V Lyngdoh, party-oni ong·katgipa MLA-rangko ra·galchina dorkastoko on·aha. Sal 14-ni gisepon uamangni kosako ja·ku de·china dabiaha.
