TURA: Ia bilsioba 100 Drums Wangala Festival ba dama bol 100-ko doke Wangala manianiko November 7 tarikoni November 9 tarikona Wangala A·dam Chibragre-o ong·attaiengani gimin ia manianiko ong·atna gita Hundred Drums Wangala Festival Committee (HDWFC) kamrangko ka·chichasotokengaha.
Ia 100 Drums Wangala manianiko bilsiantian ia committee, a·dok sorkari aro dingtang dingtang dolrangni dakchakanichi ong·atrongenga aro ia bilsioba apsan daken ia Wangala manianiko ong·atna gita kamrangko ka·chichasotokengaha.
Ia 100 Drums Wangala manianio bilsiantian Garo Hills-ni dingtang dingtang biaprangoni dol 10 Wangalgipa dolrang bak ra·rongenga aro ia dolrangna agreba, Assam, Nagaland aro Bangladesh-oniba Wangalgipa dolrang bak ra·rongenga.
Ia 100 Drums Wangala manianiko ong·atna tarisamsoengani gimin talataniko on·angengon, batanggimin changrango ia 100 Drums Wangala manianiko Chibragre-o ong·atanio neng·nikanirangko chagrongna nangahani gimin ia changode ia biapona re·napani cholguga dilsako aro re·ongkatpilna rama dilsako dingtang dingtang dake tarisoenga ine publicity committee-ni membor FK Marak parakataha.
“Ia Wangala A·damona re·baenggipa pilak garirangan, NEHU-ni Rural Development Department-o donggipa Fishery Point-oni re·napbagen aro ia biaponi re·angpilengon, Chibragre Picnic Spot gita Goeragre-o donggipa national highway ramaona re·angpilgen,” ine Marak u·iataha.
Organising committee-ni donsogimin program gitade, skanggipa sal, chong·motan November-ni 7 tariko, Handloom & Handicraft Exhibition-ko oprake on·angan baksana OPATA aro ASA NEHU-ni chrokani, Master Chef Cooking Competition aro uandakgipa gipin program-rang donggen. Gnigipa salo, Contemporary Folk Song Competition ba A·chikrangni ring·susaanirang jekai Harara, Nanggorere, Serejing Wal·jan, Sonatchi Boiar, Gogaiwai Gosaiwai, Ang’ Atchiram A·songtang Garo Hills, Chanchiate Aman A·songko, An·sengriri Aiao Angade, Akai Dira, Mewek Mewek Mikoa, Hai Anga Dania aro uandakgipa ring·susaanirangko ong·attaigen ine u·iataha. Classic Folk Song jekai Ajea, Doroa, Dama Doksusaa, Grika aro uandakgipa program-rangkoba ia Wangala manianio ong·atanggen.
Ia 100 Drums Wangala maniani bon·kamgipa sal, chong·motan November-ni 9 tariko, ia Wangala manianio bak ra·enggipa dol 10 Wangalgipa dolrangni dama bol 100-ko doke Wangala chrokaniko nikangskana man·gen.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaengachim.
