SHILLONG: North Eastern Hill University (NEHU)-o ong·enggipa golmalo political dolrang darangba jak on·pana nangja maina dolsa jak on·paahaode gipin dolrangba on·pagen aro uandaken bon·kamaode ian political dolrangni dinggrikram gitasa ong·aignok ine Sukrobar salo, Meghalaya Pradesh Congress Committee (MPCC)-ni president Vincent H Pala parakataha.
“Political dol ong·e an·ching ia golmalo jak on·pana nangja maina Congress jak on·pagenchimode, BJP-ba on·pagnok aro gipin dolrangba on·pae bon·kamaode politician-rangni dinggrikram gitasa ong·aignok. Ian NEHU-ni mikkangchina nama ong·jawa,” ine ua aganaha.
Ia golmalo jak on·pachina gita mol·molanirangko ua bang·en man·soengachim ine janapatengon, “Institute-rango anga an·tangde politics-ko bak ong·atna nangnikjani gimin chingade gelrongaia. Indiba chingo National Students Union donga aro uamang nangnikgenchimode iano jak on·pana man·a,” ine Pala aganaha.
Pala-ni aganani gitade, uni Shillong MP ong·engmiting somoirangoba NEHU-ni dingtang dingtang dolrang uona re·barongachim indiba NEHU-ko chalaianio ua politician-rangko bak ong·atna sikjae, ia dolrang baksa ua maming jak on·paani dongrongjachim.
“Parliament-o anga NEHU-ni kosako matnange agangenchimode uan NEHU-ko chalaienggiparangni aro university-ni mikkimko ra·ongalani gita ong·gen. Uni gimin anga maming saloba NEHU-ni gimin jinmao aganrongja indiba uamang angko re·bae grongeode anga minister-rangna seate uamangko grongeskagenchim,” ine MPCC president aganaha.
NEHU-ni Vice Chancellor Prof Prabha Shankar Shukla-ko kam watchina aro university-ni registrar baksana deputy registrar-ko ra·galchina dabie NEHUSU aro KSU NEHU Unit, okumu chake jingjengatanirangko dakengachim.
