TURA: National People’s Party (NPP)-ni candidate Mehtab Chandee A Sangma, jean da·o Gambegre Legislative Assembly Constituency by-eletion-o susaengachim, ua susaanio chena gita ka·dongenga ine aganaha. Ua agandapa je “manderang dingtanganiko aro namdapanina vote-rangko on·na kusi ong·a aro iako da·o sorkari rikkenggipasan uamangni nanganirangko chu·sokatna gita man·gen” ine ua aganaha.
“Anga bang·e ka·dongprete mesokna sikja, maina gimik election-an dal·gipa ra·biani ong·aia. Indiba angni wenanirangoniko niatgenchimode da·o dipet bang·a ka·donganirangko man·enga aro chingna dakchakgiparang re·anggipa jagni-jagittam rangonin bang·e ong·katarangko nikna man·aha” ine Mehtabh campaign-ni bidingo sing·anirango aganchakaha.
Gambegre LAC-o songdongenggipa manderang sanna bannani bidingo bang·a neng·nikanirangko man·ronga. Indake sanna bannaniko dakanio chu·onggijani gimin aganengon, Mehtab an·tangan saksa Doctor ong·e indake aganchakaha je “Gambegre-oni niatgenchimode Tura-an sepangbatgipa ong·a uni gimin manderang bang·bata salon Tura-ona re·babataha, indiba nanganirang gita chu·onge man·jaha, indiba chinga sorkariko rikengani gimin chinga nambatatna jotton ka·enga. Kherapara PHC-koba da·ode CHC-ona ra·doataha, anga chanchia da·ode nambatkalgnok” ine Mehtab aganaha.
“Manderangna tangka paisarangko on·e aro bosturangko on·e vote man·na salenga” ine Opposition Party-rang chingko bang·en matnanganirangko dakenga indiba uarangara matnangani kattarangsan ong·aiaha ineba ua aganaha. Chinga manderangna dakchakanirangko on·na kamrangko ka·enga, iana agre mamingba dongja. Chinga maming saloba sorkarini bosturangko iano bak nangatjaenga, ineba agankuaha.
“Beben jensalo manderang da·o gita rama jal·ang, transformer-rangni bidingo neng·nike chingna aganode chinga sorkarini gita jeko dakna man·a uarangko da·o dipet dake on·enga. Indiba gipin dakede ong·ja maina da·o dipete anga MLA ong·ja. Manderangni nanganirangna CM-chi janapaniko dakode ua uni man·a gita kamrangko ka·e on·enga.” Je election-oba sirikgenchimode ian mainiba a·sel ine agana. Indiba bang·a obostarangni a·selba ong·na man·aia. Uni gimin an·ching ge·sa election-oniko pangchake agana gita mana, ua aganaha.
TMC, Congress baksa susagrikengon NPP-na biap donggenma ine sing·anina Mehtab aganchakaha je, “NPP-na ia election-o biap donga maina manderang dingtanganiko, namdapataniko nanga aro manderang sorkariko rikenggipana vote-rangko on·na kusi ong·enga ian ge·sa dal·gipa pangchakani ong·a.”
