AMPATI: Mikkangchi dilgiparang ong·na gita chadamberangko tarisamsoanio, ‘Building Young Leaders: Empowering Adolescent Boys and Girls with Transformational Life Skills’ program-ko Sombar salo, South West Garo Hills a·jani Ampati-o donggipa St Claret Higher Secondary School-o ong·atangaha.
Ia program-ko Meghalaya Institute Governance-ni Program Coordinator June Hannifer Warbah dilangaha aro ia program-o, Betasing C&RD Block-ni BDO Crystal Ripamchi N Sangma, mongsonggipa sokgipa ong·e bak ra·angaha.
Skigiparang an·tangtangni skulrango chatro chatrirangna nambate skie on·na man·na gita iandakgipa program-rango skigiparangna training-rangko on·e, skigiparangni u·i-ma·sianirangko baridapatanian ia program-ni mongsonggipa pangchakaniba ong·a.
Ia program-o bak ra·gipa skigiparangna an·tangtangni gimin ma·siani, ka·dongani, agan-golpogrikani, basena changani, an·tango ka·donggipa ong·ani, rongtal-an·talani aro an·seng baljokani aro classroom-rango agangrikani bewalrangni bidingo agan-talatanirangko on·angaha.
Ia Training of Trainers (TOT)-ko ia bilsi dipet skigiparangna a·bachengataha aro ian a·dok gimikon dal·drobaenggipa chadamberangna nangchakeaniko ra·bana a·bachengaha.
