TURA: Kilkra-ni dingtang dingtang rokomrangko ge·ani aro kilkra ge·ani bewalrangko namdapatani bidingo game ge·e cha·giparangna agan-skie on·na gita re·anggipa November 4 tarikoni 11 tarikona vocational training program-ko Central Agricultural University (Imphal)-ni ning·o Tura-o donggipa College of Community Science (CCS)-o ong·atangaha.
Ia training program-ko Nagpur ICAR-Central Institute for Cotton Research-ni dakchakanichi ong·ataha aro ia training program-ko November-ni 4 tariko, CCS-ni Dean, Dr Jyoti V Vastrad aro West Garo Hills a·jani Rongram Block ning·o donggipa Agriculture Department-ni ADO Julie G Momin a·bachengate on·angaha.
Ia training program-ko Assistant Professor (GPB) Dr HG Kencharaddi dilaha aro ia training program-o Adugre songoni sak 36 game ge·e cha·giparang skie ra·angaha.
Ia training program-ko ong·atanio game ge·e cha·giparangna kilkra ge·aniko namdapatani, Garo Hills-o man·gipa kilkrani dingtang dingtang rokom, jo·ongrangko chel·chakani, ear bud tariani, kilkra ge·anio a·salrangko jakkalani aro uandakgipa dingtang dingtang kamrangni gimin skie on·angaha.
