TURA: North Eastern Hill University (NEHU) Tura campus-o namdapatna nangani kamrang bang·en donga ine Tura-ni social activist Cherian Momin parakatenba, iani bidingo a·dokni Chief Minister Conrad K Sangma aro Education Minister Rakkam A Sangma-na sedoataha.
“University Grants Commission (UGC)-ni niamrango pangchake chalaigipa institute ong·e, ia university-ko chalaianio, chatro chatrirangni nanganirangko nirokanio, kam ka·giparangko nirokanio aro campus gimikni gitan name chalaina man·na nangachim indiba NEHU Tura Campus-o ia niamrangoni namen dingtanganiko nikna gita man·skaenga. Uni giminsa ia campus-ko UGC-ni dongimin niamrango pangchake chalaichina anga dingtangmancha sedoatenga,” ine Momin, Chief Minister aro Education Minister-na seatgipa chittio janapataha.
NEHU Tura campus-ko nirokenggipa official-ni bidingo janapatengon, university-ni campus-rangko nambate nirokna aro chalaina man·na gita Pro-Vice Chancellor (PVC) gita dakgipa official-rangkosa songchina UGC, recommend ka·ahachim ine Momin parakataha.
“NEHU Tura campus-ko chalaienggipa ‘campus director’-de PVC gita apsan bilo university-ko chalaina bil man·jani gimin neng·nikanirangko chagrongna nangenga. NEHU Tura campus-na PVC-ko on·piltaigenchimode, chu·gimik bil gnangbate aro nambate campus-ko chalaina man·gen,” ine Momin parakataha.
NEHU Tura campus-o kam ka·enggiparangna dingtang dingtang man·gnirangko on·ani, Tura campus-o canteen dongjani gimin, campus-o chu·onga gita gari gorarang dongjani gimin, ringani chirangko chu·onga gita man·jaengani gimin, kam ka·giparang chu·ongjaengani gimin aro campus-o sanna banani cholrang dongjaengani giminba Momin, a·dok sorkarina gisik ra·atpilaniko on·angaha.
Indake ong·engon, A·chik Conscious Holistically Integrated Krima (ACHIK) dolba dingtang chittiko, NEHU Tura-ni Campus Director-na sedoatskaenba, campus-o Post Graduate Students Union (PGSU)-ko songpiltaichina aro campus director-ko kam wate on·china didiataha.
