SHILLONG: Meghalaya a·doko Smart Meter-ko chatanichi bijoli jakkalenggipa manderangna maming nangchakeanirang dongjana gita a·dokni Power Minister AT Mondal, RDSS-ni ning·o Power Ministry-oniko tangka paisarangko bi·dapataha aro a·doko chonchongipa hydro power project-rangnaba ua MNRE-oniko tangka paisani gita dakchakanirangko bi·ataha.
RDSS-ni kamrangni bidingo, Rights of Consumer Rules-ko ra·gatani bidingo, PM Har Ghar Saurya Yojana, Resource Adequacy, Pumped Storage Project aro uandakgipa kamrangni bidingo chanchirimna gita Mongolbar salo, Union Power Minister-ni dilanichi dingtang dingtang a·dokni Power Minister-rangni tom·aniko New Delhi-o ong·atangaha aro ia tom·anio a·dokni Power Minister AT Mondal-ba bak ra·angpaaha.
Ia tom·anio pilak a·dokrangan, dingtang dingtang power project-rangko chu·sokatani bidingo aro project-rangko chu·sokatanio chagrongna nangenggipa neng·nikanirangko Union Power Minister-na agan-talate on·angtokaha.
Ia tom·anio a·dokni Power Minister AT Mondal-ba, RDSS-ni ning·o chu·sokatenggipa kamrangni gimin Union Power Minister-na agan-talate on·angaha.
RDSS-ni ning·o Smart Meter scheme-ni kamrangko chu·sokatani giminba ua Union Minister-na janape on·angaha.
Smart Meter-ko chatanio bijoli jakkalenggipa manderangna maming neng·nikanirang dongjana gita meter-prako subsidy-ko on·dapchina gitaba Mondal, Union Power Minister-ko didiangaha.
A·doko Pumped Storage Project-rangko chu·sokatani bidingo janapangengon, ia project-ni damrang rakduganaba gnang ine a·doko bijoliko indin on·na man·na gita adita namgnirangko on·china Mondal didiangaha.
