TURA: North Eastern Hill University (NEHU) Shillong aro Tura campus-rango chatro chatrirang, dingtang dingtang dolrang baksa bakrime baditaba salrangna jingjengatani ja·man Budbar walo, ia campus damgninan Pro Vice Chancellor (PVC)-rangko, NEHU-ni Vice Chancellor Prof Prabha Shankar Shukla songe on·ataha.
NEHU Tura campus-na Garo Department-ni Head Dr Fameline K Marak-ko aro NEHU Shillong Campus-na Education Department-ni Head Prof Sherwin May Sungoh-ko Pro Vice Chancellor dake songe on·angaha.
Ia campus damgnina PVC songaniko Budbar attamo, NEHU-ni VC Prof Prabha Shankar Shukla parakataha aro da·o ia PVC-rangko University-ni Executive Council (EC) ra·chakna nangskakuenga.
NEHU-ni Vice Chancellor Prof Shukla-ko kam watchina, registrar aro deputy registrar-ko ra·galchina aro NEHU-ni Campus damgnion PVC-ko songe on·china gita Shillong aro Tura campus damgnion chatro chatrirang, dingtang dingtang dolrangni bakrimanichi jingjengatanirangko dakengachim ine nikna man·a.
